Komisioni Evropian po shqyrton mundësinë për të ndaluar kompanitë brenda Bashkimit Evropian nga nënshkrimi i kontratave të reja për karburantet fosile nga Rusia, tha një zyrtar i lartë i BE-së.
Po ashtu, po punohet për opsione ligjore që do t’u lejonin kompanive të BE-së të ndërpresin kontratat ekzistuese për furnizimin me gaz nga Rusia pa përballuar penalitete. Kjo përpjekje vjen në një kohë kur disa shtete anëtare janë zotuar se do të bllokojnë çdo sanksion të ri ndaj gazit rus.
Për këtë arsye, Komisioni po shqyrton mjete të tjera përfshirë masa tregtare që mund të ndalojnë kompanitë evropiane nga hyrja në kontrata të reja për karburant rus. Këto masa pritet të paraqiten në një “hartë rrugore” më 6 maj.
Qëllimi i kësaj nisme është reduktimi i blerjeve të menjëhershme të gazit natyror të lëngshëm (LNG) nga Rusia nga kompanitë evropiane. Edhe pse furnizimet me gaz përmes tubacioneve nga Rusia kanë rënë ndjeshëm që nga fillimi i pushtimit të plotë të Ukrainës në vitin 2022, importet e LNG nga Rusia në BE janë rritur vitin e kaluar,shkruan abcnews.al.Në vitin 2024, BE-ja ende mori 19% të furnizimit të saj total me gaz dhe LNG nga Rusia.
