Lidhja Demokratike e Kosovës (LDK) ka reaguar publikisht duke mohuar kategorikisht çdo pretendim për marrëveshje me Partinë Demokratike të Kosovës (PDK) apo me ndonjë subjekt tjetër politik në Prishtinë për bashkëqeverisje.
Në një komunikatë për media, LDK thekson se nuk ka qenë pjesë e asnjë procesi ndërpartiak që do të çonte në një marrëveshje të tillë dhe se strukturat e saj vendimmarrëse, si në nivel lokal ashtu edhe qendror, nuk kanë marrë pjesë në asnjë negociatë.
Sipas këtij subjekti politik, çdo pretendim për marrëveshje jashtë kanaleve zyrtare nuk përfaqëson qëndrimin e LDK-së dhe nuk krijon asnjë obligim për të. Partia rikujton se marrëveshjet ndërpartiake realizohen vetëm përmes strukturave të saj zyrtare, në mënyrë transparente dhe institucionale.
LDK gjithashtu bën të ditur se çështjet lokale do të trajtohen pas zgjedhjeve nacionale, ndërsa aktualisht fokusi i saj mbetet në procesin e ringritjes dhe konsolidimit të brendshëm.
