Kryeministri i vendit Albin Kurti ka nisur fjalimin e tij në mbledhjen e Qeverisë me shqetësimet e qytetarëve për mungesën e energjisë elektrike.
Ai tha se gjatë ditëve të fundit kanë pranuar shumë shqetësime në lidhje me furnizimin me energji elektrike në disa komuna të Kosovës.
“Këto shqetësime i kemi përcjellë vazhdimisht tek operatorët e rrjetit transmetues dhe shpërndarës, KOSTT dhe KEDS dhe kemi kërkuar nga ta angazhim maksimal në disa drejtime, përkushtim intensiv në terren për zgjidhjen e problemeve teknike të rrjetit si të prishjeve dhe të menaxhimit të mbingarkesave, komunikim të qartë e të shpeshtë me qytetarët e finalizim me urgjencë të punimeve në nënstacionin e ri të Ferizajt i cili do të zgjidhë problemin e këtij qyteti dhe do të ketë ndikim edhe në komunat tjera përreth”, tha ai.
Kreu qeveritar tha se inaugurimi e nënstacionit të ri në Fushë Kosovë dhe sanimi i dëmit nga zjarri të para disa muajve në nënstaconin “Prishtina 3” kanë pasur ndikim shumë të mirë në furnizimin e këtyre zonave”, vijoi kreu qeveritar.
Megjithatë ai u ka bërë thirrje qytetarëve që të racionalizojnë konsumin e energjisë, veçmas gjatë orëve 18:00 deri në mesnatë.
“Si çdo dimër paraprak, qytetarët i lusim që të racionalizojnë konsumin e energjisë, veçanërisht gjatë orëve 18:00 deri në mesnatë në të mirë të sigurisë së furnizimit për vete dhe gjithë vendin”.rtk.
