Kryeministri në detyrë i Kosovës, Albin Kurti, ka prezantuar projektin për banim social adekuat në Kosovë, duke e cilësuar atë si një investim të rëndësishëm për familjet në nevojë, barazinë dhe sigurinë sociale.
Në një konferencë për media, Kurti tha se Qeveria ka siguruar një fond prej 37 milionë eurosh për këtë projekt.
Sipas tij, 25 milionë euro janë siguruar përmes marrëveshjes së kredisë me Bankën për Zhvillim të Këshillit të Evropës, ndërsa 12 milionë euro janë ndarë nga Buxheti i Republikës së Kosovës. Ai theksoi se 21 komuna do të përfshihen në projekt dhe se qindra familje pritet të përfitojnë nga ndërhyrjet që do të realizohen.
Kurti theksoi se banimi është trajtuar si pjesë e politikave sociale dhe e angazhimit për mirëqenien e qytetarëve, me fokus te familjet që kanë më së shumti nevojë për mbështetje.
Ai shtoi se projekti synon të kontribuojë në luftimin e pabarazisë dhe padrejtësisë sociale, duke vendosur në prioritet familjet më të cenueshme.
“Sot po prezantojmë projektin e banimit social adekuat në Kosovë, një investim ky i rëndësishëm për identitetin e familjeve, si dhe për barazinë dhe sigurinë sociale. Një familje e cila nuk ndihet e sigurt atëherë duhet patjetër të bëhem si shtet strehë për të, një fëmijë i cili nuk mund t’i ketë mundësitë e barabarta atëherë duhet që ne t’i sigurojmë patjetër kushte të përshtatshme banimi dhe një shoqëri e shtet që nuk e luftojnë pabarazinë dhe padrejtësinë atëherë ngelen edhe familjet më të cenueshme më së shumti pa mbështetje, prandaj edhe qështjen e banimit e kemi trajtuar si pjesë politikave tona sociale dhe të angazhimit për mirëqenien e qytetarëve duke e vënë prioritetin tek ata të cilët janë më së shumti në nevojë. Qeveria ka siguruar financim përmes marrëveshjes së kredisë me Bankën për Zhvillim të Këshillit të Evropës me vlerë prej 25 milionë euro, krahas këtyre kemi ndarë edhe 12 milionë euro nga Buxheti i Republikës pra kemi siguruar një fond të përgjithshëm prej 37 milionë euro”, tha Kurti./
