Me rastin e Ditës Kombëtare të Personave të Zhdukur me dhunë gjatë luftës, kryeministri i Republikës së Kosovës, Albin Kurti, ka bërë sot homazhe te përmendorja dedikuar atyre.
Pas homazheve, Kurti ka folur para gazetarëve ku ka thënë se në takimin e 2 majit me presidentin e Serbisë, Aleksandar Vuçiq, në Bruksel, pret të diskutohet me urgjencë çështja e të pagjeturve.
Kurti ka thënë se kjo çështje nuk i ka objektiv vetëm të pagjeturit, por edhe familjarët dhe mbarë popullin e Kosovës. Ai pret nga lehtësuesit e dialogut ta trajtojnë me urgjencë çështjen.
Kjo ngase sipas tij, në aneksin për zbatimin e marrëveshjes së Ohrit saktësohet se duhet trajtim urgjent.
“Në aneksin e marrëveshjes së Ohrit, është urgjente çështja e të pagjeturve. Dhe pres që më 2 maj, ashtu pra me urgjencë, të trajtohet çështja e të pagjeturve, e cila nuk i ka vetëm objektiv të pagjeturit, por edhe familjet e tyre dhe mbarë popullin tonë. Të pagjeturit janë në një situatë të veçantë, ku ankthi është më i madh se pikëllimi, ku zemërimi është më i madh sesa vajtimi. Andaj, pres më 2 maj, nga lehtësuesit e dialogut, siç e kemi thënë në Ohër më 18 mars, kjo çështje të trajtohet me urgjencë”, ka thënë Kurti.
BE ka bërë të ditur se takimi i radhës i nivelit të lartë, mes kryeministrit të Kosovës, Albin Kurti dhe presidentit serb, Aleksandar Vuçiq do të zhvillohet më 2 maj në Bruksel.
Siç është parlajmëruar në takimin e ardhshëm të Kurtit dhe Vuçiqit do miratohet Deklarata për personat e zhdukur.
Kryeministri Kurti, ka thënë se në tekstin e deklaratës për personat e pagjetur përmendet termi “të zhdukur me dhunë”.
Më 18 mars në Ohër, Kosova dhe Serbia janë dakorduar për aneksin e zbatimit të planit të Bashkimit Evropian i njohur ndryshe si Plani franko-gjerman.
