Kryeministri në detyrë i Kosovës, Albin Kurti, ka vizituar Institutin për Mjekësi Ligjore (IML), ku janë bartur mbetjet mortore që dyshohet se u përkasin së paku 23 personave të zhdukur me dhunë gjatë luftës së fundit.
Kurti, së bashku me zëvendëskryeministren dhe ministren e Drejtësisë, Donika Gërvalla-Schwarz, tha se mbetjet mortore janë gjetur në tri lokacione në fshatrat Kalludër dhe Jabukë, në komunën e Zubin Potokut.
“Bashkë me zëvendëskryeministren dhe ministren e Drejtësisë, Donika Gërvalla-Schwarz, vizituam Institutin për Mjekësi Ligjore, ku janë bartur mbetjet mortore që dyshohet se u përkasin së paku 23 personave të zhdukur me dhunë gjatë luftës së fundit, të gjetura në tri lokacione në fshatrat Kalludër dhe Jabukë, në komunën e Zubin Potokut”, ka deklaruar Kurti.
Ai tha se sot bëhet një muaj nga fillimi i gërmimeve dhe se procesi tashmë ka kaluar në një fazë tjetër.
“Teksa sot u bën një muaj nga data e fillimit të gërmimeve, procesi veçse është në një fazë tjetër. Në IML po kryhen ekzaminimet dhe procedurat e mëtejme profesionale për identifikim dhe dokumentim. Deri më tani, katër mostra të ADN-së, të cilat i përkasin mbetjeve mortore të gjetura në Jabukë, janë dërguar për analizë në Hagë”, tha kryeministri në detyrë.
Sipas tij, që nga përfundimi i luftës janë kryer rreth 2700 gërmime, ndërsa vetëm këtë vit, nga 17 gërmime, janë gjetur gjithsej 30 mbetje mortore.
“Zbardhja e fatit të të zhdukurve me dhunë, përveçse i jep fund pritjes së familjeve, me ankth e vuajtje, i hapë rrugë kërkimit të drejtësisë”, u shpreh Kurti.
Kurti ka përmendur edhe investimet në Institutin për Mjekësi Ligjore, duke thënë se investimi prej mbi 814 mijë eurosh ka mundësuar modernizimin e infrastrukturës së institutit.
“Së fundi, investimi i mbi 814 mijë euro, ka mundësuar modernizimin e infrastrukturës së IML-së, rritjen e sigurisë dhe funksionalitetit të objektit dhe krijimin e kushteve më të mira per ofrimin e shërbimeve mjeko ligjore”, tha ai.
Ai bëri të ditur se janë rehabilituar dhe modernizuar salla e Autopsisë, Laboratorët e Toksikologjisë, Histopatologjisë dhe Antropologjisë, ndërsa është krijuar edhe një arkiv modern dhe hapësirë për ruajtjen e dëshmive.
“Janë rehabilituar dhe modernizuar salla e Autopsisë, Laboratorët e Toksikologjisë, Histopatologjisë dhe Antropologjisë, është krijuar një arkiv modern dhe hapësirë e përshtatshme për ruajtjen e dëshmive si dhe janë bërë investime në hapësirat për ekzaminime klinike mjeko ligjore”, ka deklaruar Kurti.
