Korporata MKE që pritet ta bëjë Kosovën me fabrikë municioni, është lidere për këtë industri në Turqi.
Ajo ka një histori të rrënjosur thellë që daton nga Perandoria Osmane e shekullit të 15-të me emra dhe statuse të ndryshme.
Në fillimet e saja prodhonte topa e gjyle për ushtrinë e Sulltan Mehmet II, i njohur me emrin “Pushtuesi”, pasi ia doli ta marrë Stambollin nga bizantinet, më 1453.
Aktualisht, MKE ka në posedim 10 fabrika, derisa prodhon një gamë armësh e municionesh.
Nga viti 2019 e këndej, ajo është futur në mesin e 100 kompanive më të mëdha industriale në Turqi.
Investimi që do ta bëjë në Kosovë nuk është i pari i saj jashtë vendit.
“Sipas informacioneve që ka ndarë vet MKE me ne, ka bërë investime në disa vende, duke përfshirë Jordaninë, Azerbajxhanin dhe vende tjera dhe aktualisht është në diskutim për një investim të tillë në SHBA”, ka thënë për MAT, ministri i Mbrojtjes, Ejup Maqedonci.
Disa kritika që i janë bërë përzgjedhjes së kësaj kompanie lidheshin me bindjen se fabrikën e parë të municioneve në Kosovë do të duhej ta bënte Amerika, e jo ndonjë shtet tjetër, në këtë rast, Turqia.
Për një ekspert të sigurisë, kjo nuk çon peshë.
“Të them partnerin apo ofertuesin për hapjen e saj, është ndoshta çështje pak ma irrelevante sepse mund të jetë cilido prej partnerëve tanë që është anëtare e NATO-s”, ka thënë Nuredin Ibishi.
