Janë bërë nëntë javë që kur punëtoret teknike të Kuvendit të Kosovës po mbajnë grevë për rritje pagash.
Lidhur me këtë, Kuvendi i Kosovës ka dalë sot me njoftim ku thuhet se është nënshkruar kontratë e re me operatorin e njëjtë Schafberger Jr. GmbH – Dega Kosovë, dhe se pagesa mujore për punëtoret e mirëmbajtjes/pastrimit thuhet se do të jetë së paku 400 euro, njofton Klankosova.tv.
Gjatë ditës ka pasur raportime se me kontratën e re të nënshkruar mes Kuvendit dhe operatorit privat, punëtoret e deritashme të angazhuara në Kuvend do të zëvendësohen me të tjera.
Kjo pak a shumë konfirmohet edhe nga vetë njoftimi i Kuvendit, ku thuhet se ky institucion është vetëm pranues i shërbimeve nga operatori ekonomik dhe sipas ligjit i njëjti kërkon shërbime, por thotë se “nuk ka të drejtë të ndërhyjë në përzgjedhjen e stafit të operatorit ekonomik”.
“Kontrata e mirëmbajtjes/pastrimit ka përfunduar më 14.11.2024, ndërkaq Kuvendi, pasi ka zhvilluar procedurën e prokurimit dhe bazuar në oferta, sot, më 15.11.2024 ka lidhur kontratë të re për pastrim dhe mirëmbajtje higjienike, me operatorin Schafberger Jr. GmbH – Dega Kosovë. Në respektim të Vendimit të Qeverisë për Pagën Minimale, në kontratën e lidhur sot pagesa mujore për punëtorët e mirëmbajtjes/pastrimit do të jetë së paku 400 euro. Kuvendi është pranues i shërbimeve nga operatori ekonomik dhe sipas ligjit i njëjti kërkon shërbime, por nuk ka të drejtë të ndërhyjë në përzgjedhjen e stafit të operatorit ekonomik”, thuhet në njoftimin e Kuvendit.
Lidhur me këtë çështje, Klankosova.tv ka kontaktuar me kryetarin e Sindikatës së Pavarur të Sektorit Privat të Kosovës, Jusuf Azemi.
Ai dyshon se gjatë ditës së sotme në Kuvendin e Kosovës, ky operator ka dërguar punëtore shtesë nga Universiteti i Prishtinës, ose edhe nga QMF-të.
Azemi, megjithatë thotë se ky operator nuk mund të largojë nga puna askënd, përderisa është në kontratë pune.
Në përgjigjen për Klankosova.tv, ai po ashtu tha se sot punëtoret teknike të Parlamentit nuk janë lejuar të hyjnë brenda objektit, mirëpo me insistim të nënkryetares Saranda Bogujevci, të njëjtit arritën të hyjnë brenda objektit.
“Punëtorët teknikë të Kuvendit sot nuk janë lejuar të hyjnë brenda objektit, mirëpo me insistim të nënkryetares Saranda Bogujevci, ata kanë mundur të hyjnë në Kuvend. Megjithëse ata nuk janë duku punuar, dhe dyshoj se operatori që ka fituar tenderin ka marrë punëtorë shtesë nga Universiteti i Prishtinës ose nga QMF-të, të paktën shpresojmë kështu sepse nuk dihet kë kanë lejuar brenda”.
“Sa i përket largimit nga puna, ata nuk kanë të drejtë t’i largojnë këta punëtorë pa përmbushur afatin gjashtëmujor, aq sa ju shkruan edhe në kontratën e punës”, tha Azemi për Klankosova.tv.
Ai tha se si sindikatë, ata kanë protestuar për veten e tyre për rritje pagash. “Ne po ashtu nuk kemi protestuar për ta, kemi protestuar për veten, sepse nga një pagë 275 euro është normale të kërkojmë më shumë”.
Klankosova.tv ka provuar të kontaktojë edhe me operatorin Schafberger Jr. GmbH – Dega Kosovë, mirëpo të njëjtit nuk kanë qenë të qasshëm.
