“Posti i kryeparlamentarit ka qenë parakushti i liderit të Nismës, Fatmir Limaj”, tha dy ditë më parë në RTK, kryeministri në detyrë, Albin Kurti, kur foli për takimin që ka pasur me komandant Çelikun, që kishte përfunduar pa marrëveshje.
Por, vetë Limaj që sot u shfaq në konferencë për media në zyrën e partisë që drejton, zgjodhi të mos u përgjigjet këtyre pyetjeve të gazetarëve, duke thënë se qëndrimin do ta jap në një intervistë më të gjatë, çka tha se nuk mund të bëhet në një përgjigje dy minutëshe.
Megjithatë ajo çka e ripërsëriti ishte se zgjidhja e bllokadës në Kuvend bëhet vetëm kur partia e parë të krijojë shumicën parlamentare.
“Shumicat parlamentare krijohen para se të shkohet në parlament. Duhet të ketë një shumicë parlamentare për të zhbllokuar situatën. Edhe njëherë, shumicë parlamentare siç ka ndodhur gjithmonë në Kosovë. Shumica parlamentare nënkupton edhe në Kuvend e përmes Kuvendit pasqyrohet edhe në qeveri. Partia e parë duhet ta ketë shumicën parlamentare në Kuvend që të shtyjë tutje agjendat dhe unë besoj që do të ketë shumicën parlamentare shpejt”, tha Limaj.
Kreu i Nismës tha se Kosova ka nevojë urgjente për themelimin e institucioneve, e kjo sipas tij, bëhet përmes bashkëbisedimit e krijimit të shumicës.
“Nuk ka rrugë tjetër edhe nesër të shkohet në zgjedhje, pasnesër duhet të ulen për të krijuar një shumicë. Kosova është një shtet me shumë telashe”, tha ai.
Në këtë konferencë Limaj doli për të treguar se atyre iu bashkua Forumi i Intelektualëve e sipas tij kjo nënkupton bashkimin e zërave racional.
“Kjo që po ndodhë po tregon që ne jemi në rrugën e drejt, po jep shpresë që në Kosovë po bashkohen zërat racional, në një kohë kur po dominon papërgjegjësia, herë-herë edhe arroganca politike”, tha Limaj.
