SHBA-ja do t’i pajisë Kosovën dhe Shqipërinë me mjete të blinduara, në kuadër të kontributit të tyre në Forcën Ndërkombëtare të Stabilizimit (ISF) në Gaza.
Sipas njoftimeve të Departamentit amerikan të Shtetit drejtuar Kongresit, SHBA-ja do të ridestinojë nëntë transportues të blinduar të personelit, të cilët fillimisht ishin planifikuar për Nepal, ndërsa Kosova dhe Shqipëria do të jenë përfitueset e para të këtyre pajisjeve. Uashingtoni ka ndarë gjithashtu 200 milionë dollarë për pajisje, infrastrukturë, automjete dhe shpenzime operative të ISF-së.
Administrata e presidentit Donald Trump i ka njoftuar Kongresit se do të ndajë më shumë se 206 milionë dollarë për një forcë të propozuar paqeruajtëse në Gaza, duke shënuar financimin e parë të rëndësishëm amerikan për planin e bllokuar për rindërtimin e enklavës së shkatërruar.
Në dy njoftime të datës 30 korrik, të siguruara nga Reuters, Departamenti amerikan i Shtetit informoi Kongresin se do të ndajë 200 milionë dollarë për pajisje, infrastrukturë, automjete dhe shpenzime operative të Forcës Ndërkombëtare të Stabilizimit (ISF).
Një shumë shtesë prej rreth 6 milionë dollarësh do të përdoret për përshtatjen e automjeteve të blinduara amerikane në mbështetje të kësaj force.
Njoftimet, të adresuara komisioneve kryesore të Kongresit për ndarjet buxhetore dhe marrëdhëniet me jashtë, nuk ishin raportuar më parë.
Financimi përbën shpenzimin e parë konkret amerikan për forcën paqeruajtëse dhe tregon vendosmërinë e administratës për të çuar përpara planin e Trumpit për Gazën, edhe pse Izraeli dhe Hamasi kanë kundërshtuar kushtet e nevojshme për zbatimin e tij.
“ISF-ja do të udhëheqë operacionet e sigurisë, do të mbështesë çmilitarizimin gjithëpërfshirës dhe do të mundësojë shpërndarjen e sigurt të ndihmave humanitare dhe materialeve për rindërtim në Gaza”, thuhej në njërin prej njoftimeve. Në të njëjtin dokument theksohej se përbërja përfundimtare e forcës ende po negociohet.
Deri tani, pesë shtete kanë zotuar trupa për ISF-në: Indonezia, Maroku, Kazakistani, Kosova dhe Shqipëria, ndërsa Egjipti dhe Jordania kanë marrë përsipër trajnimin e policisë. Ende nuk dihet se kur trupat do të mund të dislokohen.
Njoftimi i parë drejtuar Kongresit lidhej me fondet prej 200 milionë dollarësh. I dyti, gjithashtu i datës 30 korrik dhe me vlerë rreth 6.3 milionë dollarë, bëri të ditur se SHBA-ja do të ridestinojë nëntë transportues të blinduar të personelit, të cilët fillimisht ishin planifikuar për Nepal. Shqipëria dhe Kosova do të jenë përfitueset e para të këtyre pajisjeve, në kuadër të rolit të tyre në ISF.
Plani i armëpushimit ka ulur dhunën në Gaza, por nuk i ka dhënë fund sulmeve izraelite dhe as nuk ka siguruar çarmatimin e militantëve. Sipas zyrtarëve shëndetësorë në Gaza dhe ushtrisë izraelite, më shumë se 1,200 palestinezë dhe katër ushtarë izraelitë janë vrarë në Gaza që nga arritja e armëpushimit në tetor.
