Kandidati i Lëvizjes Vetëvendosje për kryetar të Komunës së Artanës, Abdyl Gashi, ka reaguar pas arrestimit të kandidatit për asamble komunale nga kjo parti, Rinas Zeqiri, i cili u ndalua dje në një aksion të Policisë së Kosovës në një plantacion me rreth 500 bimë të llojit kanabis sativa, transmeton KosovaPost.
Gashi ka thënë se Zeqiri i është bashkuar këtij subjekti politik vetëm një muaj më parë.
“Rinasi i është bashkuar listës sonë vetëm para rreth një muaji, me iniciativë personale dhe dëshirë për të kontribuar. Ai nuk ka qenë më parë aktivist apo anëtar i Lëvizjes Vetëvendosje. E kemi njohur së fundi dhe kemi besuar se si i ri, me gatishmëri për të punuar, mund të jepte një kontribut në Asamble. Për fat të keq, prezantimi i tij rezultoi ndryshe nga pritshmëritë tona”, ka shkruar ai në Facebook.
Dje Policia e Kosovës arriti të lokalizojë një plantacion me rreth 500 bimë të llojit kanabis sativa në një fshat të rajonit të Gjilanit. Sipas njoftimit, këto bimë ishin të mbjella në katër sera dhe ishin në një fazë të mirë zhvillimi. Si rezultat i aksionit, sipas tij, deri tash janë arrestuar tre persona të dyshuar dhe është sekuestruar një armë zjarri.
