Ministri i Mbrojtjes, Ejup Maqedonci, ka thënë se me vetë faktin që grupi terrorist i cili kreu sulmin në Banjskë në shtatorin e vitit 2023, dhe që synonin aneksimin e një pjese të Kosovës, vazhdon të jetë i lirë, i mbështetur e i mbrojtur nga Serbia, ekziston rreziku që të provojnë destabilizimin e Kosovës.
Por, tha ai, institucionet e Republikës janë aq të përgatitura saqë të mposhtin çdo rrezik që vjen për vendin.
“Patjetër është theksuar nga të gjitha dikasteret tona qeveritare, është theksuar nga kryeministri shumë herë, nga ministri i Punëve të Brendshme e Drejtori i Policisë, edhe nga unë, fakti se grupi po vazhdon të mbetet i lirë. Ai grup që ka kryer akt terrorist, që ka qenë një grup i organizuar, i armatosur, i uniformuar që ka synuar aneksimin e një pjese të territorit tonë, përveç që po mbetet i lirë në Serbi, po vazhdon të jetë i mbështetur e i mbrojtur pikërisht nga strukturat e sigurisë së Serbisë, shpesh jo larg kufirit me Kosovën. Dhe normalisht që ky grup vazhdon të ketë kontakte edhe me elementë, individë në veri të vendit tonë. E normalisht që ky grup vazhdon t’i ketë ato synime që ka pasur për destabilizimin e pjesës veriore,” tha Maqedonci në një intervistë në RTK.
Sipas tij, duke vazhduar Serbia të qëndrojë në politikën hegjemoniste në raport me fqinjët e saj, duke vazhduar të mohojë ekzistencën e Republikës së Kosovës si shtet të pavarur, duke vazhduar përmes luftës hibride të kontribuojë në destabilizimin e vendit tonë, por edhe vendeve të tjera fqinje, sipas tij, e gjithë kjo është indikacion që rreziku ekziston.
“Por ekziston edhe mundësia e madhe e institucioneve tona që ta mposhtin çdo rrezik për vendin tonë, për faktin që tani nuk është viti 2020. Në veri kemi strukturat tona shtetërore, kemi Policinë e Kosovës, nuk është situata e para disa vitesh kur ka pasur mundësi të destabilizohet nga grupe të caktuara,” tha ai.
Maqedonci tha se Serbia e ka obligim ndërkombëtar që t’i dorëzojë terroristët në vendin ku e kanë kryer krimin, në Kosovë.
Maqedonci: Marrëveshja me Shqipërinë e Kroacinë, marrëveshje për paqen e stabilitetin e Ballkanit Perëndimor
Maqedonci foli për marrëveshjen me Shqipërinë e Kroacinë, që e quajti marrëveshje për paqen, sigurinë dhe stabilitetin në Ballkanin Perëndimor. “Një marrëveshje mes tri vendeve mike është një ndër marrëveshjet më të natyrshme që mund të ndodhë mes vendeve që ndajnë të njëjtat vlera e interesa”, tha ai.
Ministri në detyre shtoi se marrëveshja adreson katër pika qendrore, e para, sipas tij, do të jetë bashkëpunimi në fushën e industrisë ushtarake. “Është imediate investimi në prodhim ushtarak. Duke bashkëpunuar si tri vende, mundësia për të bashkëpunuar dhe pasur hapësirë në tregun ndërkombëtar është më e madhe”, vijoi tutje Maqedonci.
Tutje, ai tregoi se me Shqipërinë e Kroacinë janë dakorduar që të punojnë bashkë për të mbrojtur nga sulmet dhe kërcënimet, dhe të punojnë në sigurimin e infrastrukturës kritike.
Sipas tij, sulmi në Ibër-Lepenc ka ndezur alarmin në gjithë Ballkanin Perëndimor.
“Ne jemi dakorduar që të punojmë bashkërisht për t’u mbrojtur nga sulmet dhe kërcënimet, dhe të punojmë bashkë në sigurimin e infrastrukturës kritike. Dihet që sulmi në Ibër-Lepenc ka ndezur alarmin jo vetëm tek ne, por edhe në gjithë Ballkanin Perëndimor, për mundësitë që grupet e ndryshme terroriste mund të përdorin për kërcënimin e sigurisë së vendeve të ndryshme”, tha ai.
Maqedonci: Deklaratat e NATO-s për FSK-në, nuk janë asgjë e re
Kur foli për deklaratat e shefit të NATO-s që para pak javësh qëndroi në Kosovë dhe e quajti FSK-në me rol humanitar, Maqedonci tha se një deklaratë e tillë nuk është asgjë e re.
“Të gjitha deklaratat zyrtare që kanë ardhur nga NATO, kanë ardhur në këtë drejtim për FSK-në si një forcë me mandate të kufizuar. NATO i referohet vitit 2009 e jo 2018, kur Kuvendi i Kosovës ka ndryshuar ligjet, kur FSK mori mandat ushtarak. Çka është e rëndësishme është se të gjitha vendet veç e veç në aspektin bilateral njohin mandatin e FSK-së si ushtri”, tha ai.
Rrugëtimi nga uniforma ushtarake në kostumin politik
Maqedonci foli edhe për rrugëtimin e tij nga uniforma ushtarake në kostumin politik. Ai tha se edukimi që marrin në shkolla të ndryshme ushtarake përveç tjerash formëson edhe lidershipin.
“Pra formëson profesionalisht një ushtarak të drejtojë jo vetëm një njësi ushtarake, por edhe si lider. Mua më ka ndihmuar edhe pjesa ushtarake për të formësuar edhe aspektin politik dhe çka është për t’u theksuar, duhet të kemi parasysh se ushtria është një instrument i politikës në fund, dhe politika bën politikat e mbrojtjes që ushtria i zbaton. Unë kam pasur fatin që të kem rrugëtimin që e ka pasur edhe vetë Ushtria e Kosovës nga UÇK në TMK me mandat të kufizuar, pastaj në FSK në dy pjesë, në njërën me mandat të kufizuar e pjesën tjetër si ushtri që u bë me ndryshime ligjore”, tha Maqedonci.
