Një rast i rëndë është raportuar në një shkollë në Klinë, ku një mësues dyshohet për sulm seksual ndaj një nxënëseje të mitur.
Rasti është paraqitur pasditen e djeshme në Stacionin Policor në Klinë, nga prindi i viktimës, i cili ka raportuar shqetësimet lidhur me vajzën e tij, nxënëse e klasës së shtatë në një shkollë në Zllakuqan.
Për teve1.info, zëdhënësi i Policisë së Kosovës për rajonin e Pejës, Fadil Gashi ka bërë të ditur se i dyshuari 42 vjeç, dyshohet se i ka dërguar në vazhdimësi mesazhe me përmbajtje seksuale përmes rrjeteve sociale.
Ai bëri të ditur se rasti është trajtuar në prezencë të Prokurores kujdestare nga Departamenti për të Mitur, mbrojtësit të viktimave dhe punëtorit social, ndërsa është intervistuar edhe viktima në prani të prindit.
Ndërkohë, i dyshuari është arrestuar dhe është sjellë në stacion policor, ku në prezencë të avokatit mbrojtës është mbrojtur në heshtje. Me urdhër të Prokurores, rasti është iniciuar si “Sulm seksual”, ndërsa i dyshuari është ndaluar për 48 orë.
Ai tha se rasti është nën hetime.
