Javën e kaluar u raportua se ka ndërruar jetë një mësimdhënëse e moshës 23 vjeçare, e cila ishte vrarë në mes të rrugës në Irlandë, përcjell KosovaPost.
Ashling Murphy u vra teksa kishte dalë për vrap në brigjet e Kanalit të Madh në Tullamore, County Offaly. Zona njihet si Rruga e Fionës, në kujtim të një gruaje tjetër që u zhduk 25 vjet më parë, ndërkohë që ishte 7 muajshe shtatzënë. Vdekja e Ashling ka nxitur edhe njëherë debatin për sigurinë e femrave në Irlandë, por edhe më gjerë.
Mediat britanike shkruajnë se policia po përpiqet të identifikojë një person me biçikletë, i cili dyshohet se e ndoqi viktimën në zonë, përgjatë 24 orëshit përpara vrasje. Autoritetet irlandeze thuhet se kanë bërë mjaft progres në hetimet, megjithatë nuk ka ende detaje të bëra publike.
Ndërkohë kontrolle po bëhen në prona në Tullamore dhe Dublin.
Sa i përket personit që u pa nga banorët duke lëvizur në zonë me biçikletë, është e mundur që ai të ketë informacion se çfarë i ndodhi Ashling. Ndërkohë, zyrtarët nuk përjashtojnë mundësinë që mësuesja të jetë përndjekur përgjatë 24 orëve përpara vrasjes.
Për vdekjen e së resë përgjatë fundjavës u mbajtën homazhe në disa qytete të Irlandës. Familjes së saj iu bashkuan qytetarë të shumtë mbrëmjen e së premtes teksa ndezën qirinj në vendin ku u vra.
Ata po ashtu dyshojnë se vrasësi ishte i vetëm. Ngjarja ndodhi rreth orës 16:00 të së mërkurës. Autori u largua me vrap në momentin që dy kalimtare po vinin drejt vendit të ngjarjes. Ashling ishte ende gjallë kur mbërriti policia. Ata u përpoqën t’i jepnin ndihmë mjekësore, por e reja nuk u arrit të shpëtohej.
Hetuesit e çështjes thanë se nuk do të lenë asnjë gur pa lëvizur derisa të çojnë para drejtësisë vrasësin e saj.
Rruga ku 23-vjeçarja u vra, mban emrin e Fiona Pender, e cila për herë të fundit u pa në orën 06:00 më 23 Gusht të vitit 1996. Që prej asaj kohe hetimet për zhdukjen e saj vijojnë, por fati i Fionës mbetet i panjohur.