Mijëra izraelitë u mblodhën në Tel Aviv të Izraelit mbrëmë për të kërkuar lirimin e menjëhershëm të pengjeve që mbahen në Gaza, raporton Anadolu
Duke mbajtur pankarta dhe duke brohoritur parulla, protestuesit marshuan në qendër të qytetit.
Nëpërmet pankartave dhe banderolave, ata bënë thirrje si: “Jepini fund luftës”, “Askush nuk është i lirë derisa të gjithë të jenë të lirë” dhe “Kthejini pengjet, jo luftën”.
Protestuesit kërkuan vazhdimin e procesit të shkëmbimit të të burgosurve ndërmjet Hamasit dhe Izraelit, përfundimin e sulmeve izraelite në Gaza dhe kthimin e izraelitëve nga Gaza.
Demonstruesit mbanin gjithashtu fotografi të të afërmve të tyre dhe flamuj izraelitë dhe bërtisnin slogane kundër kryeministrit izraelit Benjamin Netanyahu dhe politikanëve në qeverinë e tij.
Izraeli vlerëson se 59 pengje mbahen ende në Gaza, me të paktën 22 prej tyre të gjallë. Ata pritet të lirohen në një fazë të dytë të marrëveshjes së armëpushimit dhe shkëmbimit të të burgosurve në Gaza, e cila do t’i kërkonte Izraelit të tërheqë plotësisht forcat e tij nga Gaza dhe t’i japë fund luftës përgjithmonë.
Faza e parë e marrëveshjes së armëpushimit hyri në fuqi nga janari, duke ndalur luftën gjenocidale të Izraelit në Gaza që ka vrarë më shumë se 48.400 viktima, kryesisht gra dhe fëmijë, dhe e ka lënë enklavën në gërmadha.
Nëntorin e kaluar, Gjykata Ndërkombëtare Penale lëshoi urdhër arresti për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavën palestineze.
