Prishtinë – Ministria e Punëve të Brendshme (MPB) ka reaguar ndaj deklaratave të ish-deputetit të AAK-së, Daut Haradinaj, të bëra në emisionin “Debat Plus” në TV Dukagjini, duke i cilësuar ato si të pasakta dhe dezinformuese lidhur me pretendimet se dy persona nga komuniteti serb kanë përfituar së fundmi shtetësinë e Republikës së Kosovës, përcjell Kosova Post.
Sipas MPB-së, regjistrimi i shtetësisë së Milovan Bojović dhe Suzana Ranković nuk ka asnjë lidhje me Ligjin e ri për Shtetësinë apo me procesin aktual të regjistrimit të fakteve të gjendjes civile, pasi të dy personat figurojnë në regjistrat civilë prej shumë vitesh.
Ministria ka bërë të ditur se Milovan Bojović është regjistruar për herë të parë në vitin 2007 dhe ka qenë posedues i dokumenteve identifikuese të UNMIK-ut, ndërsa letërnjoftimin e Republikës së Kosovës e ka marrë në vitin 2011. Po ashtu, MPB thekson se ai ishte arrestuar nga Policia e Kosovës më 8 prill 2016, por pas një vendimi të Gjykatës së Apelit për ndërprerjen e paraburgimit, ishte liruar dhe më pas larguar nga territori i Kosovës.
Ndërkaq, për Suzana Ranković, MPB-ja sqaron se ajo është qytetare e Republikës së Kosovës dhe se nuk është vajza apo mbesa e Aleksandër Rankovićit, siç është pretenduar nga Haradinaj. Sipas ministrisë, ajo kishte poseduar letërnjoftim të UNMIK-ut që nga viti 2001 dhe dokumentin e Kosovës e ka marrë në vitin 2015.
MPB u ka bërë thirrje përfaqësuesve politikë dhe akterëve publikë që të verifikojnë faktet para deklarimeve publike, duke theksuar se përhapja e informatave të pasakta mund të dezinformojë opinionin dhe të dëmtojë besimin e qytetarëve në institucionet shtetërore.
Në fund, Ministria e Punëve të Brendshme ritheksoi përkushtimin e saj ndaj zbatimit të ligjit, transparencës institucionale dhe informimit të saktë të qytetarëve të Republikës së Kosovës.
