Ministrja e Arsimit, Arbërie Nagavci bën të ditur se premtimin për ndërtimin e 160 çerdheve e kanë bërë në mënyrë që të rritet përfshirja e fëmijëve në edukimin e hershëm.
Ajo thotë se gjatë javës së ardhshme do të hapet tenderi për ndërtimin e çerdheve të parafabrikuara.
“Siç e dini, përfshirja e fëmijëve në edukimin e hershëm është një nga synimet e Qeverisë tonë, ka qenë një nga premtimet e Qeverisë Kurti dhe në këtë drejtim për të rritur përfshirjen e fëmijëve në edukimin e hershëm, është e nevojshme të përmirësohet edhe infrastruktura fizike. Në këtë linjë, ne kemi premtuar ndërtimin e 160 çerdheve në mënyrë që të rritet përfshirja e fëmijëve në edukimin e hershëm… ne e kemi shpallë tenderin për projektimin dhe mbikëqyrjen e këtyre objekteve, dhe tani jemi, besoj që më së largu që në javën e ardhshme do të hapet edhe tenderi për ndërtimin e objekteve të parafabrikuara”, deklaroi ajo në një intervistë në “Info Nata” në Tëvë 1.
Ministrja Nagavci theksoi se në bazë të analizave, këto çerdhe janë një model shumë i mirë, të cilat në njërën anë e shkurtojnë kohën e ndërtimit të tyre, e në anën tjetër janë edhe në linjë me agjendën e gjelbër, përkatësisht në ruajtjen e ambientit.
Sipas saj, se ku do të ndërtohen çerdhet, varet edhe nga komunat, “të cilat duhet të identifikojnë lokacionet, por edhe të kryejnë aspektet tjera tekniko-formale”.
