NATO njofton se Këshilli i Atlantikut të Veriut u mblodh sot (në formatin KFOR), së bashku me partnerët kontribuues me trupa, për një diskutim me komandantin e KFOR-it, gjeneralmajorin Özkan Ulutaş, transmeton KosovaPost.
Në raportimin e tij të fundit para Këshillit, në të cilin mori pjesë virtualisht, komandanti dha një përditësim mbi përpjekjet e vazhdueshm të KFOR-it për të ndihmuar në ruajtjen e një mjedisi të sigurt dhe të qëndrueshëm për të gjithë njerëzit që jetojnë në Kosovë dhe të lirisë së lëvizjes.
Kjo bëhet në kuadër të Rezolutës të Këshillit të Sigurimit të Kombeve të Bashkuara të vitit 1999, në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në rolet e tyre përkatëse si përgjegjës për reagimin në fushën e sigurisë.
“Ai ndau gjithashtu pikëpamjet e tij mbi përpjekjet e vazhdueshme për të optimizuar praninë e KFOR-it, që vijnë si rezultat i përmirësimit të vazhdueshëm të situatës së sigurisë në Kosovë. Procesi i optimizimit synon të sigurojë që misioni të mbetet i përshtatshëm për qëllimin e tij. Ai bazohet në kushtet në terren, po zbatohet gradualisht dhe do të jetë plotësisht i kthyeshëm, në rast zhvillimet përkatëse të sigurisë e kërkojnë këtë”, thuhet në komunikatën e NATO-s.
NATO bën me dije se KFOR-i do të mbetet i pajisur, trajnuar dhe organizuar në mënyrë të përshtatshme për të zbatuar mandatin e tij afatgjatë të OKB-së dhe do të ruajë kapacitetet, gatishmërinë dhe fleksibilitetin e nevojshëm për të përballuar një sërë skenarësh të sigurisë.
“Ballkani Perëndimor është një rajon me rëndësi strategjike për Aleancën. Angazhimi i NATO-s për të mbështetur sigurinë e qëndrueshme në Kosovë dhe stabilitetin rajonal mbetet i palëkundur. NATO gjithashtu vazhdon të mbështesë fuqishëm Dialogun e lehtësuar nga BE-ja për normalizimin e marrëdhënieve ndërmjet Beogradit dhe Prishtinës, si kornizë për zgjidhjen e çështjeve të mbetura, duke respektuar të drejtat e të gjitha komuniteteve”, thuhet në komunikatën e NATO-s.
Gjeneralmajori Ulutaş pritet ta përfundojë mandatin e tij të dytë në krye të KFOR-it në mesin e tetorit. Atë do ta pasojë gjeneralmajori Roberto Vergori nga Italia.
