Kanceri i qafës së mitrës është kanceri i dytë më i zakonshëm te gratë, veçanërisht në vendet në zhvillim.
Në botë çdo vit diagnostikohen rreth 600.000 raste të reja të kancerit të qafës së mitrës, dhe çdo minutë ky lloj kanceri diagnostikohet tek një grua, shkruan Gazeta Shneta.
Java Evropiane e Parandalimit të Kancerit të Qafës së Mitrës është një fushatë sensibilizuese e cila fillon nga data 23 deri me 29 janar dhe ka për qëllim të rrisë informimin dhe ndërgjegjësimin për parandalimin dhe kapjen e hershme të kancerit të qafës së mitrës te femrat.
Një fushatë e tillë ka zënë vend dhe në kryeqytet, ku i pari i shëndetësisë në Komunën e Prishtinës, Dr. Izet Sadiku ka thënë se vetëm në vitin 2022 janë realizuar 2161 Pap teste në institucionet shëndetësore në Prishtinë.
Kjo shifër shënon një ngritje prej 45 për qind në krahasim me shifrën e vitit 2021.
Sadiku, mes tjerash ka thënë se që nga viti 2016 në Prishtinë ka filluar projekti për depsitimin e kancerit të qafës së mitrës.
Ndërsa është shprehur se që nga muaji shkurt do të filloj trajnimi i mjekëve familjar me qëllim që Pap testi të bëhet në të gjitha qendrat e mjekësisë familjare në kryeqytet.
Organizata Botërore e Shëndetësisë (OBSH), rekomandon një sërë veprimesh për parandalimin e kancerit të qafës së mitrës.
Veprimet e rekomanduara përfshijnë që nga komponentët e edukimit të komunitetit, mobilizimit social, vaksinimin, depistimin, trajtimin dhe deri tek kujdesi paliativ.
Pothuajse çdo rast me kancer të qafës së mitrës mund të parandalohet nëpërmjet depistimit dhe vaksinimit.
Tashmë është e provuar se programet e depistimit të kancerit të qafës së mitrës mund të parandalojnë deri në 80% të rasteve, dhe së bashku me vaksinën mund të reduktojnë ndjeshëm nivelet e këtij kanceri.
Në Kosovë, gjatë muajit dhjetor kanë arritur 300 vaksina kundër kancerit të qafës së mitrës.
Sipas rekomandimeve të ekspertëve të Institutin Kombëtar të Shëndetit Publik, është thënë se mosha më e mirë e parandalimit dhe vaksinimit janë femrat nga mosha 9 deri në 15-vjeçe.
Organizata Botërore e Shëndetësisë në Kosovë, kanë thënë se nga përvoja e shteteve të zhvilluara, rastet e imunizuara kanë rezultuar se janë të mbrojtur deri në 99% nga kanceri i qafës së mitrës.
