Në kryeqytetin e Kosovës, Prishtinë, u organizua një pritje zyrtare me rastin e “23 Prillit – Ditës Kombëtare të Turqve të Kosovës”, raporton Anadolu, transmeton KosovaPost.
Në pritjen zyrtare e organizuar në një hotel në Prishtinë morën pjesë ministri i Tregtisë i Turqisë, Omer Bolat, kryeministri i Kosovës, Albin Kurti, zëvendëskryeministri i Kosovës për Çështje të Komuniteteve dhe Bashkëpunim, Fikrim Damka, ambasadori i Turqisë në Prishtinë, Sabri Tunc Angili, komandanti i Forcës Paqeruajtëse të NATO-s në Kosovë (KFOR), gjeneralmajor Ozkan Ulutas, si dhe shumë të ftuar nga Kosova, vendet e rajonit dhe Turqia.
Në ceremoninë që nisi me intonimin e himneve kombëtare të dy vendeve, ministri Bolat përcolli “urimet më të përzemërta të presidentit Recep Tayyip Erdogan, për anëtarët e komunitetit turk të Kosovës, përfaqësuesit e nderuar të protokollit dhe për gjithë popullin e Kosovës”.
Bolat tha se kjo ditë e rëndësishme lartëson identitetin, kulturën dhe ekzistencën historike të komunitetit turk të Kosovës dhe njëkohësisht përbën një nga pasqyrimet më të fuqishme të lidhjeve të thella mes Turqisë dhe Kosovës.
Duke iu referuar kontakteve që zhvilloi gjatë ditës në Kosovë, Bolat theksoi se kishte zhvilluar takime shumë të rëndësishme në Kosovë, ku kishte ardhur me një delegacion të gjerë, me qëllim që marrëdhëniet mes dy vendeve të ngrihen në nivele edhe më të larta.
Duke tërhequr vëmendjen se investimet turke në Kosovë janë rritur dhe se tregtia mes Kosovës dhe Turqisë ka arritur kufirin e një miliard dollarëve, Bolat theksoi se kanë filluar përgatitjet për zgjerimin e marrëveshjes ekzistuese të tregtisë së lirë mes dy vendeve edhe në sektorin e shërbimeve.
“Për Turqinë, Ballkani nuk shpreh vetëm një afërsi gjeografike, por një të ardhme të përbashkët të formuar nga lidhjet tona të thella historike, njerëzore dhe ekonomike. Shteti i Kosovës, me strukturën e tij shumëkulturore, traditën e tolerancës dhe dinamikën shoqërore, përbën një nga shembujt më të bukur të kulturës së paqes dhe bashkëjetesës në Ballkan”, tha ai.
Bolat theksoi se do të vazhdojnë të japin mbështetje të fortë për rritjen e miqësisë, stabilitetit, qetësisë dhe mirëqenies ekonomike mes Kosovës dhe vendeve të tjera të Ballkanit.
“Presidenti ynë bën përpjekje të mëdha edhe në platformat ndërkombëtare për zhvillimin dhe unitetin politik të Kosovës, si dhe për mbështetjen e saj. Do t’i forcojmë edhe më tej marrëdhëniet tona tregtare dhe ekonomike. Si Turqi, ashtu si gjithmonë, do të vazhdojmë të qëndrojmë pranë Kosovës mike dhe vëlla, të gjithë popullit të Kosovës dhe bashkëkombësve tanë turq në Kosovë”, theksoi ai.
– Kurti: Komuniteti turk në Kosovë është pjesë e pandashme e ndërtimit të shtetit tonë demokratik
Kryeministri i Kosovës Albin Kurti tha se marrëdhëniet mes Turqisë dhe Kosovës nuk mbështeten vetëm në nivel shtetëror, por edhe në lidhje të forta mes popujve.
“I nderuar ministër, prania juaj dhe pjesëmarrja e të gjithë mysafirëve të nderuar tregojnë qartë thellësinë e marrëdhënieve mes Kosovës dhe Turqisë, si dhe lidhjet historike, kulturore dhe njerëzore që bashkojnë popujt tanë”, theksoi Kurti.
Ai nënvizoi se komuniteti turk në Kosovë është një nga elementet themeluese të vendit dhe “pjesë e pandashme e ndërtimit të shtetit tonë demokratik”.
Kurti tërhoqi vëmendjen se marrëdhëniet mes dy popujve shkojnë përtej dimensionit historik.
“Marrëdhëniet mes shqiptarëve dhe turqve nuk kufizohen vetëm në dimension historik. Këto lidhje përfshijnë një hapësirë të përbashkët kulturore, intelektuale dhe shpirtërore”, tha Kurti.
Duke e cilësuar Turqinë si “partner të rëndësishëm strategjik” për Kosovën, Kurti shprehu mirënjohje të thellë ndaj presidentit Recep Tayyip Erdogan dhe qeverisë turke për mbështetjen që i kanë dhënë forcimit të pozitës ndërkombëtare të Kosovës.
– Damka: Ne nuk jemi mysafirë të kësaj gjeografie, por kujtesa e saj
Zëvendëskryeministri njëherësh kryetari i Partisë Demokratike Turke të Kosovës (KDTP), Fikrim Damka, tha se këtë vit festimet kanë kuptim të veçantë pasi përkojnë me 75-vjetorin e rishfaqjes së komunitetit turk në Kosovë.
“Këtë vit, njëkohësisht shënojmë 75-vjetorin e rishfaqjes së turqve të Kosovës në këto troje dhe fitimit të të drejtave të tyre. 75 vjet; kjo nuk është vetëm një periudhë kohe, por emri i durimit, rezistencës, punës dhe besimit”, tha Damka.
Ai theksoi se komuniteti turk do të vazhdojë të luajë rol konstruktiv në të ardhmen e Kosovës.
“Ne nuk jemi mysafirë të kësaj gjeografie, por kujtesa e saj. Ishim dje, jemi sot, do të jemi edhe nesër”, tha ai.
Damka tha se mbështetja e Turqisë për komunitetin turk në Kosovë formëson jo vetëm të tashmen, por edhe të ardhmen, duke shtuar se komuniteti turk do të vazhdojë të kontribuojë në zhvillimin e Kosovës me gjuhën, kulturën dhe punën e tij dhe se është i vendosur të ndërtojë të ardhmen e përbashkët.
Pas fjalimeve, në pritjen zyrtare u shfaq një video e përgatitur me rastin e 75-vjetorit të njohjes së të drejtave të turqve në Kosovë. Ceremonia përfundoi me shfaqjen folklorike të anëtarëve të Shoqatës “Gercek” për Kulturë, Art dhe Sport, si dhe të Shoqatës Turke për Kulturë dhe Art “Dogru Yol”.
Me rastin e “Ditës Kombëtare të Turqve të Kosovës”, e cila festohet çdo vit më 23 prill që nga shpallja e pavarësisë së Kosovës më 17 shkurt 2008, në mbarë vendin organizohen aktivitete të ndryshme kulturore dhe artistike.
