Të paktën një person u vra dhe 18 të tjerë u plagosën sot pasi ushtria izraelite nisi një valë të re sulmesh ajrore në kryeqytetin sirian, Damask, tha Ministria e Shëndetësisë e vendit, transmeton Anadolu.
Agjencia shtetërore e lajmeve SANA tha se avionët luftarakë kryen sulme në Kompleksin e Shtabit të Përgjithshëm dhe Pallatin Presidencial, të njohur si Qasr al-Shaab, në kryeqytet.
Radioja Ushtarake e Izraelit konfirmoi se një “sulm paralajmërues” u krye pranë Pallatit Presidencial në Damask.
Videot që po qarkullojnë në mediat sociale tregojnë momentet e sulmeve izraelite në Damask, me re tymi që ngrihen nga zona.
Sulmet erdhën menjëherë pasi Ministri izraelit i Mbrojtjes, Israel Katz, u zotua për “goditje të dhimbshme” ndaj Damaskut.
“Sulmet e dhimbshme kanë filluar”, tha Katz ndërsa ndau një video që tregonte një prezantuese të kanalit sirian të lajmeve SyriaTV gjatë një transmetimi kur një shpërthim i fuqishëm shihet pas saj, duke tronditur transmetimin.
Sipas transmetuesit publik të Izraelit, KAN, ushtria izraelite ka goditur gati 160 objektiva në Siri që nga mbrëmë, shumica e tyre në qytetin jugor Suwayda.
KAN tha se shefi i ushtrisë Eyal Zamir ka urdhëruar transferimin e forcave nga Rripi i Gazës në Lartësitë e pushtuara të Golanit të Sirisë.
Ushtria izraelite nisi sulme ajrore në territorin e Sirisë që nga e marta, veçanërisht në Suwayda, në shkeljen e fundit të sovranitetit të vendit mbi pretendimet për mbrojtjen e druzëve në Siri.
Sulmet erdhën ndërsa ushtria siriane vendosi forca në provincë për të rivendosur sigurinë dhe për të mbrojtur civilët dhe pronën e tyre, pas përleshjeve midis grupeve të armatosura druze dhe beduine që lanë të paktën 30 të vdekur.
