Presidentja e vendit, Vjosa Osmani ka thënë se ushtria dhe policia e Kosovës janë të gatshme kurdo në mbrojtje të sovranitetit dhe paprekshmërisë së territorit të Kosovës.
Osmani ka bërë thirrje për bashkim në një front në Kosovë në të mirë të Republikës, çka sipas saj nevojitet në këtë periudhë të sfidave dhe kërcënimeve globale. Ajo ka folur në manifestimin qendror të 15-vjetorit të Pavarësisë së Kosovës ku kanë parakaluar kuadratet e policisë dhe ushtrisë së Kosovës.
Osmani ka përmendur zhvillimet e fundit në veri të vendit ndërkohë që ka theksuar përkushtimin dhe vendosmërinë e Policisë së Kosovës për të ruajtur rendin dhe ligjin.
“Sikurse ushtria jonë që dëshmohet e na bën krenarë çdo herë, edhe Policia e Kosovës e cila së fundi u përballë me angazhim të shtuar nga zhvillimet në veri të vendit, ka treguar përkushtim e vendosmëri për ta ruajtur rendin dhe ligjin por mbi të gjitha për ta ruajtur sovranitetin në çdo cep të Republikës së Kosovës. Këto vajza e djem janë pasardhësit e Ushtrisë Çlirimtare të Kosovës të cilët e kthyen dhe e mbrojtën dinjitetin e popullit tonë prandaj faleminderit secilit veç e veç”, ka thënë presidentja Osmani.
Komandantja supreme ka deklaruar se FSK-ja është e gatshme kurdo në mbrojtjen e sovranitetit dhe paprekshmërisë territoriale.
“Forca jonë është profesionale dhe e gatshme kurdo në mbrojtjen e sovranitetit dhe paprekshmërisë së territorit të Republikës sonë andaj sot së bashku me ju qytetarë të nderuar do të kemi mundësinë që ushtrisë sonë e policisë sonë t’i themi së bashku faleminderit gjatë këtij parakalimi. Si shoqëri dhe si shtet i detyrohemi ushtarëve tanë e policisë sonë si dhe sakrificës së tyre, ata janë mishërim i vetëmohimit dhe i shërbimit, e pavarësia jonë nuk është vetëm çlirim nga robëria por edhe përpjekje e çdoditshme e jona për një shoqëri të bazuar në drejtësi barazi dhe prosperitet për gjithë qytetarët pa dallim”, ka thënë Osmani.
Ajo ka falënderuar shtetet e Bashkuara të Amerikës duke thënë se janë aleatët e përjetshëm të Kosovës.
Ndërsa ka bërë thirrje për bashkim në një front në Kosovë, siç ka thënë ajo në të mirë të Republikës.
“Periudha në të cilën po kalon shteti ynë në këtë kohë të sfidave dhe kërcënimeve globale shton nevojën e bashkimit tonë në një front, në të mirë të republikës sepse vetëm kur jemi bashkë jemi të suksesshëm. Republika jonë është e shenjtë dhen e duhet ta trajtojmë dhe ta ruajmë si të tillë. Republika e Kosovës është e përjetshme siç do të jenë të vazhdueshme edhe përpjekjet tona për ta fuqizuar atë dhe për të vazhduar për tu ndjerë krenar me shtetin i cili është interesi ynë mbi secilin interes tjetër”, ka thënë Osmani.
Presidentja e vendit ka thënë se në 15-vjetorin e Pavarësisë së Kosovës kujtojnë sakrificën e tw gjithë atyre që luftuan trimërisht dhe ranë heroikisht për të siguruar lirinë.
Ajo ka thënë se Republika e Kosovës mban vulën e sakrificës së 3 mijë dëshmorëve të Ushtrisë Çlirimtare të Kosovës të cilët u udhëhoqën nga komandanti legjendar Adem Jashari.
Sipas Osmanit, liria dhe pavarësia janë testamenti i tij dhe i shumë brezave.
Në manifestimin qendror të 15-vjetorit të Pavarësisë së Kosovës kanë parakaluar kuadratet e Forcës së Sigurisë së Kosovës si dhe ata të Policisë së Kosovës.
