Presidentja e Kosovës, Vjosa Osmani, është vënë në fokusin e kritikave nga kundërshtarët e saj politik dhe disa eksponentët te opinionit publik, të cilët e akuzojnë për anshmëri politike.
E në një prononcim për “Bota sot” në lidhje me presidenten Osmani, qëndrimet e saj dhe kritikat që po i bëhen nga oponentët politik, foli opinionisti Dedë Preqi.
Së pari, ai u shpreh se kritikat ndaj Osmanit janë personale, më shumë se që janë të vërteta.
Sipas tij, presidentja po akuzohet pa të drejtë për afërsi me Kurtin, pasi ka pasur në të kaluarën kundërshti në tema të caktuara, por për çështje që janë në interes të shtetit gjithmonë janë në një linjë.
‘Para së gjithash, duhet të mendojmë për ato gjëra të cilat nuk kanë një qëllim të vërtetë në vetvete, si për shembull format e shpifjeve nga disa gazetarë, të cilët shërbejnë si hajmeli i opozitës, për të larguar pushtetin e tanishëm, sepse janë të ligj dhe të paaftë për t’u mbrojtur ndaj një pushteti që ka guximin për të vënë në veprim vendosmërinë dhe të drejtat e këtij populli.
Pse presidentja e Kosovës, Dr. Vjosa Osmani, përballet me kritika të ndryshme nga gazetarë të “porositur”, të cilët – sipas perceptimit të tyre – pretendojnë se presidentja po mban qëndrim në favor të kryeministrit Albin Kurti? Çfarë rëndësie ka kjo, edhe nëse do të ishte e vërtetë, nëse ky qëndrim do të ishte në favor të këtij vendi dhe shteti?
Nuk do të thotë se njëri dhe tjetri nuk kanë pasur edhe kundërthënie gjatë rrugëtimit të tyre politik dhe strategjik për të mirën e këtij populli dhe vendi. Por, si gjithmonë, për kauzat e mëdha, ata do t’i gjenim në një linjë të përbashkët. Dhe çfarë ka këtu për t’u diskutuar, për t’u demantuar apo për t’u shënjestruar nga kushdo qoftë?”
Krahas kësaj, Preqi vlerëson se Osmani po kritikohet edhe për shkak të kundërshtisë së saj ndaj Listës Serbe, e që edhe LVV është kundër saj.
Ai përmendi faktin se subjekti serb në vazhdimësi ka kundërshtuar shtetin e Kosovës dhe se brenda tij ka kriminelë serbë.
Presidentja e vendit, Vjosa Osmani, kohët e fundit po përballet me kritika të ndryshme nga gazetarët e porositur, e cila në një mënyrë sulmohet pse është një kritikuese e ashpër ndaj Listës Serbe, meqenëse ky grup i njerëzve nuk është gjë tjetër veçse një grumbull që në mesin e vet ka plot kriminelë, të cilët nuk e duan dhe nuk e pranojnë shtetin e pavarur të Kosovës.
Ndaj Listës Serbe, si një grup i veçantë në vendin tonë që vepron kundër institucioneve dhe ligjeve të Kosovës, të njëjtin qëndrim e mban edhe Lëvizja Vetëvendosje, me në krye Albin Kurtin. Kjo lëvizje ka theksuar disa herë se ky grup njerëzish nuk është në një linjë të përbashkët me këtë vend dhe se duhet të merren masa adekuate ndaj atyre që gjenden në mesin e tyre, të cilët e duan Kosovën të ndarë dhe të përçarë.
Presidentja Vjosa Osmani nuk ishte pajtuar as me veprimet e fundit të Gjykatës Kushtetuese të Kosovës, e cila tërhoqi një kërkesë për shkak të emërimit si gjyqtar raportues të Radomir Llabanit – një figurë e akuzuar nga gjykatat në Serbi për korrupsion dhe krim të organizuar. Një tërheqje e tillë, sipas Osmanit, përbën një vërejtje të madhe ndaj kësaj gjykate, e cila mban në përbërje një gjyqtar me të kaluar të tillë”, shpjegoi ai.
Po ashtu, opinionisti foli edhe për deklaratën që Osmani bëri në lidhje me afërsinë e Radoiçiqit me disa gazetarë shqitparë.
“Presidentja e vendit, me të drejtë, i ka quajtur disa gazetarë përkrahës të Radoiçiqit, nëse aktiviteti i tyre është në kundërshtim me vlerat e njerëzve të këtij vendi, duke nënvlerësuar krerët e shtetit të vet, të cilët po përpiqen me çdo kusht t’i kthejnë këtij shteti dhe populli dinjitetin dhe sovranitetin”
Gjithashtu, ai konsideron se Osmani ka mbajtur neturalitet me të gjitha partitë dhe shpesh ka bërë thirrje për unitet.
‘Presidentja Vjosa Osmani është munduar gjithmonë ta ruajë një neutralitet në raport me partitë politike. Ajo shpesh ka heshtur për çështjet e tyre, por është e vërtetë që disa herë ka bërë thirrje për unitet të përbashkët, sidomos kur bëhet fjalë për çështje madhore të vendit.
Presidentja e shtetit, Vjosa Osmani, ka shprehur shqetësimin e saj për veprimet e Listës Serbe, e cila, sipas saj, nuk duhet të jetë pengesë për zhvillimet demokratike në Kosovë. Ajo, edhe në këto momente, po bëhet shkaktare e një abuzimi me shtetin, duke sfiduar Gjykatën Kushtetuese dhe vënë në pikëpyetje funksionimin e Kuvendit”.
Ndër të tjera, ai shtoi se si gruaja me e votuar në Kosovë dhe rajon, Osmani nuk meriton meriton etiketime të pavërteta dhe shpifje.
“Së pari, secili prej nesh duhet të merret me fëmijët e vet. Po ashtu, edhe presidentja Osmani ka të drejtë të reagojë për fëmijët e saj, për të cilët paguan nga paga e saj për t’i shkolluar, edukuar dhe mbrojtur. Prandaj, gazetarët e ndershëm nuk duhet të merren me fëmijët e saj, duke i përgjuar jashtëligjshëm kudo që lëvizin, sepse ka çështje më të rëndësishme për t’u trajtuar.
Shoqëria jonë demokratike duhet të trajtojë me kujdes dhe në mënyrë të barabartë të drejtat gjinore, veçanërisht ato të gjinisë femërore. Por, në vend që të japin përkrahje dhe të kontribuojnë në avancimin e saj, disa shprehin të kundërtën, duke përdorur etiketime të padrejta ndaj grave të afta dhe të guximshme – siç është presidentja jonë Vjosa Osmani.
Presidentja Vjosa Osmani nuk meriton etiketime të pavërteta dhe shpifje. Ajo është gruaja më e arrirë dhe më e votuara në Kosovë dhe në rajon, duke dhënë modelin më të mirë të bashkimit dhe harmonisë ndërnjerëzore, për të cilin ndiejnë lakmi edhe shumë vende perëndimore”, përfundoi Dedë Preqi për “Bota sot”.
