Aktivisti dhe Hoxha i njohur nga Malisheva, Bedri Bytyçi, ka reaguar publikisht ndaj përmbajtjeve të transmetuara në TV Arbëria, duke akuzuar mediumin se në mënyrë të vazhdueshme paraqet fenë islame dhe besimtarët myslimanë si rrezik për kulturën dhe traditën shqiptare, përcjell Kosova Post.
Në reagimin e tij, Bytyçi pretendon se debatet në emisione janë të koordinuarat paraprakisht dhe se përmbajtje të tilla, sipas tij, po ndikojnë në rritjen e përçarjeve dhe gjuhës së urrejtjes në rrjetet sociale.
Ai u ka bërë thirrje Komisionit të Pavarur të Mediave (KPM), Prokurorisë, Qeverisë së Kosovës dhe institucioneve të tjera përgjegjëse që të shqyrtojnë nëse ka pasur shkelje të ligjit ose të standardeve profesionale të transmetimit.
Në të njëjtin reagim, Bytyçi ka bërë të ditur se pret që çdo veprim ligjor i mundshëm, përfshirë iniciativat e përmendura nga avokati Asdren Bytyqi dhe avokatja Nora Huseinovic, të zhvillohet përmes institucioneve dhe në përputhje me ligjin.
Deri në momentin e publikimit të këtij lajmi, TV Arbëria nuk ka publikuar një reagim publik lidhur me këto akuza.
