Shefi i Grupit Parlamentar të PDK-së, Arian Tahiri, dhe deputeti Përparim Gruda kanë deklaruar se shumica parlamentare po e shtyn vendin drejt një krize të re institucionale, duke paralajmëruar zgjedhje të reja dhe përplasje kushtetuese.
Në një konferencë për media, ata kritikuan refuzimin e marrëveshjeve politike për zgjedhjen e presidentit, duke theksuar se mungesa e vullnetit politik po çon vendin drejt krizave të njëpasnjëshme politike. Sipas tyre, Kosova po shkon sërish drejt zgjedhjeve jo për shkak të mungesës së alternativave për zgjidhje, por për shkak të refuzimit të tyre nga shumica parlamentare.
Tahiri tha se PDK ka vepruar me përgjegjësi gjatë gjithë procesit, duke pranuar rezultatin e zgjedhjeve dhe duke marrë pjesë në takimet me kryeministrin Albin Kurti për të gjetur një zgjidhje politike. Ai theksoi se partia ka mbështetur edhe idenë e një kandidati konsensual, përfshirë një emër nga familja Adem Jashari, si dhe ka ofruar marrëveshje gjithëpërfshirëse ose të kufizuar vetëm për zgjedhjen e presidentit.
Nga ana tjetër, deputeti Gruda tha se Kuvendi i Kosovë ka dështuar ta zgjedhë presidentin brenda afatit kushtetues dhe se mosveprimi institucional ka sjellë si pasojë shpërndarjen e Kuvendit. Sipas tij, kompetenca për zgjedhjen e presidentit është detyrim kushtetues dhe jo çështje diskrecionale.
Në fund, ata theksuan se interpretimi që lejon shmangien e shpërndarjes së Kuvendit përmes mosnisjes së procedurave për zgjedhjen e presidentit është në kundërshtim me parimet kushtetuese, ndërsa përsëritën se vendi nuk ka nevojë për kriza politike, por për stabilitet institucional dhe zhvillim ekonomik.
