Komuna e Prishtinës ka njoftuar se një segment i rrugës “Fehmi Lladrovci” do të mbyllet përkohësisht për qarkullim, për shkak të punimeve infrastrukturore që po realizohen nga Drejtoria e Investimeve Kapitale, përcjell KosovaPost.
Sipas njoftimit, mbyllja do të jetë në fuqi nga 10 deri më 18 korrik 2026, ndërsa do të përfshijë pjesën e rrugës nga Rrethi i Flamurit deri te Rrethi i Spitalit.
“Për shkak të zhvillimit të punimeve infrastrukturore që po realizohen nga Drejtoria e Investimeve Kapitale, nga 10 deri më 18 korrik 2026 do të mbyllet përkohësisht për qarkullim segmenti i rrugës ‘Fehmi Lladrovci’, nga Rrethi i Flamurit deri te Rrethi i Spitalit”, thuhet në njoftimin e Komunës së Prishtinë.
Nga Komuna u është bërë thirrje qytetarëve dhe pjesëmarrësve në trafik që të planifikojnë lëvizjet e tyre duke përdorur rrugë alternative dhe të tregojnë mirëkuptim gjatë kohës së punimeve.
