Drejtori i të ashtuquajturës Zyra për Kosovën në qeverinë e Serbisë, Petar Petkoviq, ka deklaruar se në tekstin e Deklaratës për Personat e Zhdukur, që u miratua dje në Bruksel, është hequr termi “zhdukje me forcë”.
Kjo sipas tij, është bërë falë përpjekjeve të palës serbe.
“Në vend të këtij termi, u miratua termi “i zhdukur me forcë”, i cili nuk është kategori ligjore dhe nuk gjendet në asnjë konventë ndërkombëtare, por përshkruan vetëm rrethanat në të cilat ka ndodhur zhdukja dhe për rrjedhojë nuk mund të prodhojë asnjë efekt juridik”, thotë Petkoviq.
Shefi i Politikës së Jashtme të Bashkimit Evropian, Joseph Borell ka njoftuar se Kosova dhe Serbia janë pajtuar në lidhje me deklaratën për çështjen e të pagjeturve.
“Marrëveshja që ata arritën për tekstin e deklaratës për personat e pagjetur në takimin e djeshëm të kryenegociatëve është hapi i parë. Ne do ta miratojmë atë në nivel liderësh në takimin e ardhshëm të nivelit të lartë që do të mbledh”, deklaroi Borrell, shkruan lajmi.net.
Në anën tjetër, lidhur me këtë, kryetari i Komisionit Qeveritar për Personat e Pagjetur, Andin Hoti ka thënë më shumë detaje sa i përket marrëveshjes së arritur në Bruksel.
“Prandaj më nuk do të ketë vetëm persona të zhdukur, por persona të zhdukur me dhunë nga shteti serb. Gjithashtu, më duhet të theksoj si tepër të rëndësishmë, që me anë të kësaj deklarate Serbia detyrohet të marrë përsipër hapjen e arkivave dhe prezentimin e dokumentave serkrete mbi vendndodhjen e personave të zhdukur me dhunë”, ka thënë Hoti.
Hoti më tutje ka thënë se sapo të pranohet deklarata nga niveli i lartë, do të publikohen edhe hapat e ardhshëm të nevojshëm për zbatimin e kësaj deklarate.
