Presidenti i Turkiyes, Rexhep Tajip Erdogan dënoi ashpër bastisjen e Izraelit në Xhaminë Al-Aksa në Jerusalemin Lindor, transmeton KosovaPost.
“Turkiya nuk mund të qëndrojë e heshtur përballë sulmeve ndaj muslimanëve dhe vendeve tona të shenjëta. Bastisja e xhamisë Al-Aksa dhe shkelja e shenjtërisë së Haram al-Sharif është vija jonë e kuqe,” tha Erdogan pas një darke iftari me pensionistët në kryeqytetin Ankara.
Deklaratat e tij erdhën pasi tensioni u përshkallëzua kur policia izraelite arrestoi rreth 350 besimtarë nga brenda kompleksit të Xhamisë Al-Aksa.
Një grup palestinezësh u barrikaduan gjatë lutjeve në kompleksin e Xhamisë Al-Aksa pasi kolonët hebrenj bënë thirrje për një bastisje në xhami. Ata u përpoqën të pengonin hyrjen e policisë duke mbyllur dyert e saj.
Policia izraelite u ngjit në çatinë e xhamisë, thyen xhamat dhe fillimisht përdori bomba zanore kundër besimtarëve brenda. Disa në xhami u përpoqën t’i rezistonin policisë duke hedhur fishekzjarre.
“Dënoj aktet e ndyra kundër kibles së parë të myslimanëve dhe bëj thirrje që sulmet të ndalen sa më shpejt të jetë e mundur”, tha Erdogan.
Duke thënë se Izraeli ndjek “politikën e shtypjes”, Erdogan shtoi se populli palestinez nuk është i vetëm./KosovaPost/.
