Presidentja meksikane Claudia Sheinbaum njoftoi se ka refuzuar një propozim nga homologu i saj amerikan Donald Trump për të vendosur trupa amerikane në Meksikë për të ndihmuar në luftimin e karteleve të drogës, transmeton Anadolu.
Gjatë një ngjarjeje publike, Sheinbaum konfirmoi një raportin të “Wall Street Journal” të publikuar më parë, i cili zbuloi se Trump ka kërkuar përfshirje më të madhe të ushtrisë amerikane në luftën kundër drogës në Meksikë, raportoi “Los Angeles Times”.
“Është e vërtetë”, tha Sheinbaum, duke shtuar se në disa telefonata private me Trumpin në muajt e fundit, presidenti amerikan ka thënë: “Si mund t’ju ndihmojmë të luftoni trafikun e drogës? Unë propozoj që Ushtria e Shteteve të Bashkuara të hyjë për t’ju ndihmuar”.
Sheinbaum tha se ajo e ka hedhur poshtë propozimin e tij, duke i thënë: “Jo, president Trump, territori ynë është i patjetërsueshëm, sovraniteti është i patjetërsueshëm… Ne mund të bashkëpunojmë, mund të punojmë së bashku, por ju në territorin tuaj dhe ne në tonin. Ne mund të ndajmë informacione, por nuk do ta pranojmë kurrë praninë e Ushtrisë së Shteteve të Bashkuara në territorin tonë”.
Sipas një raportimi të Wall Street Journal më 2 maj, Trump në një telefonatë me Sheinbaumin më 16 prill ka thënë se trupat amerikane që ai do t’i dërgonte mund të ndihmonin kundër karteleve në Meksikë.
