Prishtina ka njoftuar për arritjen e marrëveshjeve për largimin e gjashtë futbollistëve: Sulmuesi Gauthier Mankenda, portieri Betim Halimi, mesfushori Agim Zeka, mbrojtësi Aleksandar Ristevski, qendërmbrojtësi Josip Tomasevic dhe sulmuesi Sadam Sulley.
“Gauthier Mankenda është një ndër lojtarët që ka dhënë kontribut të jashtëzakonshëm për FC Prishtinën në shtatë vitet e fundit. Sulmuesi nga Kongo në këtë verë ka vendosur që të ndërrojë mjedis duke u transferuar në Letoni te skuadra Liepaja”, thuhet në njoftim.
Ai ka qenë pjesë e bardheklatërve nga janari i vitit 2016, ndërkohë që në total i ka regjistruar 166 paraqitje duke shënuar 32 gola dhe ka kontribuar me 27 asistime. 24-vjeçari gjatë këtyre viteve e ka fituar titullin kampion dhe Superkupën e Kosovës me Prishtinën.
Portieri Betim Halimi dhe Prishtina kanë arritur marrëveshje që ta ndërpresin kontratën para kohe.
Ai iu bashkua kryeqytetasve në gusht të vitit 2021 nga skuadra ukrainase, Olimpik Donetsk, teksa me ekipin prishtinas është paraqitur gjithsej në 15 ndeshje zyrtare në të gjitha garat.
Mesfushori ofensiv, Agim Zeka, në edicionin e ardhshëm nuk do të jetë pjesë e Prishtinës, pasi që me marrëveshje është larguar nga skuadra kryeqytetase.
Ai iu bashkua bardhekaltërve në janar të këtij viti dhe është paraqitur në 13 ndeshje në të gjitha garat me ç’rast e ka shënuar edhe një gol.
Mbrojtësi nga Maqedonia e Veriut, Aleksandar Ristevski, është larguar nga Prishtina me marrëveshje të dyanshme.
Qendërmbrojtësi kroat, Josip Tomasevic dhe Prishtina kanë gjetur gjuhën e përbashkët për ndërprerjen e kontratës para kohe.
28-vjeçari erdhi në kryeqytet në shkurt të këtij viti nga skuadra e Cibalias në Ligën e Dytë të Kroacisë dhe luajti në 12 ndeshje zyrtare.
Prishtina dhe sulmuesi Sadam Sulley e kanë ndërprerë bashkëpunimin edhe zyrtarisht.
25-vjeçari iu bashkua bardhekaltërve në janar të këtij viti nga skuadra sllovake FK Senica dhe është paraqitur në total në 16 ndeshje zyrtare në të gjitha garat me ekipin kryeqytetas dhe i ka realizuar shtatë gola.