Ministri në detyrë i Kulturës, Rinisë dhe Sportit, Hajrulla Çeku, është zyrtarizuar sot si kandidat i Lëvizjes Vetëvendosje për kryetar të Prishtinës.
Lajmin e ka bërë të ditur vetë Çeku përmes një postimi në Facebook, ku theksoi se ky vendim i Këshillit të Qendrës së VV-së në Prishtinë nuk është vetëm një hap formal, por një zotim për një drejtim të ri për kryeqytetin, përcjell KosovaPost.
“Është nder dhe përgjegjësi që e marr me gjithë përkushtimin tim,” ka shkruar Çeku, duke paraqitur edhe vizionin e tij për një Prishtinë që “funksionon, që zhvillohet dhe që nuk lë askënd pas.”
Në mesazhin e tij, ai renditi disa nga prioritetet kryesore të platformës së tij qeverisëse, përfshirë:
- Lagje të pastra dhe me jetë komunitare,
- Arsim cilësor dhe gjithëditor,
- Infrastrukturë moderne për sportin,
- Ekonomi familjare të qëndrueshme,
- Shëndetësi të avancuar dhe të afërt me qytetarin,
- Administratë digjitale dhe efikase,
- Kulturë si industri kreative dhe treg pune të drejtë për gratë e të rinjtë,
- Transport publik funksional dhe siguri për të gjithë,
- Zhvillim të barabartë për fshatrat dhe qytetin,
- Planifikim urban që ruan identitetin dhe ndërtim me kuptim,
- Institucione që dëgjojnë, jo që heshtin.
“E duam një Prishtinë ku gjithkush ndihet pjesë e zhvillimit dhe ku secili qytetar gjen hapësirë për jetë dinjitoze,” shkruan Çeku, duke shtuar se ndërtimi i kësaj Prishtine do të bëhet “me plan, me punë dhe me Vetëvendosje.”
Ai ka shpërndarë edhe disa fotografi nga zyrtarizimi i kandidaturës së tij.
