Policë të paidentifikuar para dy dite arrestuan Bashkim Smakën, luftëtarin e UÇK-së dhe ish shefin e AKI – së, Fadil Fazliun, ushtarin e UÇK-së dhe vëlla të dy dëshmorëve të Kombit, Fahri dhe Bahri Fazliu, Isni Kilaj, ushtarin e UÇK-së dhe ish- kryetarin e Malishevës.
Për orë të tëra bastisën shtëpinë e Hajredin Kuçit, bartës i shumë posteve të larta në Kosovën e pasluftës ish – ministër i Drejtësisë dhe pjesë e ekipit mbrojtës të presidentit Thaçi në Hagë. Atij iu la urdhërlajmërimi për paraqitje para Gjykatës Speciale Raciste në Hagë më 9 dhjetor 2024.
Presidenti Thaçi nuk u arrestua sepse mbahet i arrestuar më shumë se katër vite në Burgun e Hagës. Prokuroria e Inkuizicionit Special kundër UÇK – së dhe shqiptarëve ngriti një aktakuzë duke cilësuar si një grup i organizuar dhe i angazhuar për të penguar administrimin e drejtësisë duke bërë presion ndaj dëshmitarëve. E keqja që po përsëritet është se Policia e Kosovës po merr pjesë, në cilësinë e punëtorit fizik edhe gjatë bastisjes si dhe arrestimit të shqiptarëve, kryesisht ushtarë të UÇK-së, familjarë apo përkrahës të luftës. Ndonëse procesi ndaj Hashim Thaçit, Jakup Krasniqit, Kadri Veselit dhe Rexhep Selimit është duke vazhduar para një trupi gjykues të korruptuar profesionalisht, moralisht dhe mbase edhe materialisht, nuk iu bëhet vonë që Thaçin ta akuzojnë edhe për një vepër tjetër që në shtetet normale nuk ndodhë shpesh.
Në fakt, në ish – Jugosllavinë ka pasur raste kur shqiptarët gjatë procesit të gjykimit ngarkoheshin edhe një aktakuzë të çastit për t’i dënuar disa vite më tepër. Kjo histori represive dhe regresive po përsëritet në Hagë nga mashtruesit juridikë, armiqësisht të disponuar kundër luftës për liri dhe UÇK-së.
KMDLNj, që nga fillimi e ka kundërshtuar këtë gjykatë sepse ndanë “drejtësi” sipas kriterit etnik sikur që cakton përgjegjësinë gjithashtu sipas parimit etnik. Mbi 90% të viktimave nuk i trajton vetëm se janë shqiptarë sikur që falë 90 % për qind të atyre që planifikuan, nuk e penguan apo e kryen krimin shkaku se janë serbë. Kësi rasti nuk mund ta gjeni askund në botë ku janë formuar gjykata për krime lufte dhe krime kundër njerëzimit, që nga Gjyqi i Nyrembergut e deri te ky monstrum juridik, GJSR në Hagë. Kjo gjykatë është themeluar në kushte të një terrorizimi nga faktori ndërkombëtar ndaj deputetëve të Kuvendit të Kosovës kurse, me shantazh dhe mashtrime i është bartë tërë autoriteti vendimmarrës kësaj organizate të përbashkët “juridike” në Hagë duke e zhveshur Kosovën 100 për qind nga ushtrimi i sovranitetit juridik ndonëse, nga të dyja palët thuhet dhe pranohet se GJSR është themeluar nga Kuvendi i Kosovës dhe se e njëjta është pjesë e sistemit të drejtësisë së Kosovës që rrjedhimisht nënkupton se duhet të punojë sipas ligjeve të Kosovës dhe duhet ta respektojë Kushtetutën e Kosovës. Kjo Gjykatë përkundrazi brutalisht ka dhunuar ligjet dhe Kushtetutën e Kosovës sikur që shtetin e Kosovës e ka shpërfillur me paturpësinë më të madhe. Me Serbinë, prokurorinë dhe gjykatat e këtij shteti ka bashkëpunuar ngushtë dhe miqësisht e sidomos me shërbimet informative dhe kundërinformative nga ka siguruar dëshmitarë të sajuar dhe materiale që përbëjnë afërsisht 70 për qind të materialeve “dëshmuese” dhe dëshmitarëve serbë dhe atyre që flasin shqip.
Kjo GJRS nuk ka asnjë shenjë identifikuese të shtetit të Kosovës sikur që as gjuha shqipe nuk është zyrtare. GJSR bashkëpunon me pushtetin aktual vetëm në dëm të të akuzuarve, që edhe e ka pëlqimin e tyre.
Ky devijim juridik nuk është aspak transparent, askujt nuk i jep llogari dhe nuk lejon monitorim të pavarur. Nuk krijon kushte për një proces gjyqësor të drejtë, të paanshëm dhe të pandikuar nga politika dhe grupet e interesit. Në çdo mënyrë përpiqet ta pamundësojë mbrojtjen efektive të të akuzuarve. Brutalisht e shkelë parimin e publicitetit sikur që e dhunon prezumumin e pafajësisë përmes kërcënimeve publike të Baba Vangës – Ekaterina Trandafilova, Jack Smith etj. Deri më tani nuk është marrë asnjë vendim në favor të të akuzuarve, janë refuzuar thuaja të gjitha kërkesat e tyre. Të gjitha vizitat, të privilegjuara dhe jo të privilegjuara janë përgjuar, janë lejuar të vizitohen edhe nga persona që kanë dhënë informata te kjo prokurori dhe gjykatë.
Kuvendi i Kosovës ka pasur qëndrim qyqar duke mos guxuar as të kërkojnë respektimin e të drejtave të njeriut të personave të privuar nga liria për të burgosurit, të gjithë shqiptarë dhe të gjithë shtetas të Kosovës. Këta mjeranë, jo që nuk kanë guxuar të kërkojnë mbrojtjen e të drejtave të njeriut por, paturpësisht kanë marrë edhe mëditje për këto vizita. Edhe vizitat i kanë bërë selektive, në baza politike dhe partiake.
Hashim Thaçi, Jakup Krasniqi, Kadri Veseli dhe Rexhep Selimi disa herë i janë drejtuar GJSR për shkak të anshmërisë së tyre, çdo herë janë refuzuar. Çka iu mbetet të ndërmarrin në mbrojtje të drejtave të tyre për një gjykim të drejtë, të paanshëm dhe të pandikuar politikisht dhe nga grupet e interesit në kohën kur pushteti aktual është rreshtuar prapa prokurorisë dhe gjykatës?!
- Të kërkojnë monitorues ndërkombëtarë dhe vendorë që do të monitorojnë gjykimin.
- Të refuzojnë t’i përgjigjen pyetjeve në rrethana ekzistuese.
- Ta refuzojnë këtë gjykatë në këtë përbërje.
- Të mos marrin pjesë në gjykim dhe, si masë e skajshme
- Greva e urisë për sensibilizim të opinionit për mohim të një të drejte elementare të njeriut për një gjykim të drejtë, të paanshëm dhe të pandikuar politikisht dhe nga grupet e interesit.
Në Kosovë do të duhej të organizoheshin më seriozisht të burgosurit politikë dhe veteranët e luftës në mbrojtje të të drejtave të njeriut të personave të privuar nga liria që janë në Hagë sikur që edhe institucionet që do të dalin pas zgjedhjeve të 9 shkurtit 2025 duhet ta dëshmojnë pronësinë mbi këtë gjykatë nëse vërtetë është pjesë e sistemit të drejtësisë së Kosovës dhe punon sipas ligjeve të Kosovës. Nëse jo, atëherë po ky Kuvend duhet ta zhbëjë këtë trup të huaj në sistemin e Drejtësisë të Kosovës që në seancën e parë.
