Rusia është e hapur për negociata për përfundimin e luftës në Ukrainë nëse ato nisen nga presidenti i sapozgjedhur amerikan, Donald Trump.
Këtë e konfirmoi ambasadori i Moskës në OKB në Gjenevë, duke shtuar se “çdo bisedim duhet të bazohet në realitetin në frontin e luftës”.
Kështu, ai sinjalizoi se Rusia kërkon që të mbajë brenda territorit të saj rajonet e aneksuara të Ukrainës. Trump ka kritikuar vazhdimisht ndihmën perëndimore për Kievin dhe ka premtuar t’i japë fund konfliktit me shpejtësi, pa shpjeguar se si.
Fitorja e tij në zgjedhjet presidenciale të 5 nëntorit ka nxitur shqetësime në Kiev dhe kryeqytete të tjera europiane për një zbehje të mbështetjes për Ukrainën nga Uashingtoni, shkruan A2CNN.“Trump premtoi të zgjidhë krizën ukrainase brenda natës. Në rregull, le të përpiqet. Por ne jemi njerëz realistë, sigurisht e kuptojmë se kjo nuk do të ndodhë kurrë”, tha Genadi Gatilov, ambasadori rus në selinë e OKB në Gjenevë.
