Kandidatja demokrate Kamala Harris në zgjedhjet presidenciale në SHBA, e cila pohoi se rivali i saj republikan Donald Trump po ndan vendin, ndërsa ajo do ta bashkojë vendin, u protestua nga qindra njerëz në tubimin që mbajti në Washington për shkak të mbështetjes së pakushtëzuar që SHBA-ja i jep Izraelit, transmeton Kosova Post.
Përderisa emocionet po shtohen në pak ditët e mbetura për zgjedhjet presidenciale që do të mbahen më 5 nëntor në SHBA, kandidatja demokrate Harris zhvilloi tubim elektoral në kryeqytetin Washington.
Dhjetëra mijëra njerëz morën pjesë në tubimin e mbajtur në zonën e quajtur “The Ellipse”, ku ish-presidenti Donald Trump mbajti fjalim para bastisjes së Kongresit më 6 janar 2021.
Në fjalim, Harris fajësoi rivalin e saj Trump dhe argumentoi se vetëm ajo dhe ekipi i saj mund të zgjidhin problemet themelore të SHBA-së dhe se Trump do të sillte vetëm “kaos” dhe “krizë”.
“Donald Trump ka kaluar një dekadë duke u përpjekur ta mbajë popullin amerikan të ndarë dhe të frikësuar nga njëri-tjetri, sepse ky është ai. Por, unë jam këtu për t’ju thënë: Nuk jemi të tillë. Unë premtoj të jem presidente për të gjithë amerikanët dhe gjithmonë do ta vendos vendin mbi partinë”, tha Harris.
Ajo theksoi se “recetat ekonomike” të propozuara nga Trump do të dëmtojnë grupet me të ardhura të mesme dhe të ulëta. Harris tha se në planin e saj ekonomik, më shumë njerëz do të jenë në gjendje të zotërojnë shtëpi në kushte më të lehta dhe do të ulin barrën tatimore të klasës së mesme.
Protestë në mbështetje të Palestinës në tubimin e kandidates Harris
Përderisa Harris vazhdonte fjalimin e saj, një grup njerëzish prej rreth 300 personash brohoritën parulla në favor të Palestinës dhe Rripit të Gazës dhe protestuan kundër administratës Biden-Harris.
Demonstruesit pro-palestinezë mbanin pankarta dhe kërkonin embargo armësh ndaj Izraelit: Ata mbanin pankarta me mbishkrimet: “Kamala, çfarë thua? Ne nuk do të votojmë për ty ditën e zgjedhjeve. Sa fëmijë ke vrarë sot?”.
Grupi vazhdoi protestën deri në fund të fjalimit të Harris-it. Më pas ecën në rrugën ku ndodhet Shtëpia e Bardhë, shoqëruar me pankarta dhe slogane.AA.
