Sulmet ajrore të përbashkëta britanike dhe amerikane që synonin rebelët Houthi të Jemenit kanë vrarë të paktën 16 persona dhe kanë plagosur 42 të tjerë, numri më i lartë i vdekjeve të pranuara publikisht nga rebelët.
Tre zyrtarë amerikanë në kushte anonimiteti, i kanë përshkruar sulmet si goditje e një game të gjerë objektesh nëntokësore, qendra komandimi dhe kontrolli, një anije Houthi dhe të tjera objekte.
Ata e quajtën sulmin si kundërpërgjigje e sulmeve në rritje të Houthive mbi anijet në Detin e Kuq, shkruan AP.
Siç raportohet, sulmi është kryer me aeroplanët luftarakë të SHBA-së F/1-18 të cilët janë ngritur nga aeroplanmbajtësja USS Dwight D. Eisenhower në Detin e Kuq.
I menjëhershëm ishte reagimi i zyrtarit të grupit militant, Mohammed al-Bukhaiti, i cili kërcënoi me hakmarrje.
“Ne do ta përcjellim përshkallëzimin me përshkallëzim”, tha ai.
Ndërkohë, Ministria britanike e Mbrojtjes njoftoi se FGR4 i Forcave Ajrore Mbretërore ka kryer sulme në Hodeida, si dhe në Ghulayfiqah.
“Sulmet u ndërmorrën në vetëmbrojtje përballë një kërcënimi të vazhdueshëm që paraqesin Houthit”, tha kryeministri britanik, Rishi Sunak, përcjell Telegrafi.Ndryshe, SHBA-ja dhe Britania e Madhe kanë nisur sulmet kundër Houthive që nga janari, si kundërpërgjigje ndaj goditjeve të vazhdueshme të anijeve në Detin e Kuq.
