Sekretari i ri amerikan i Shtetit, Marco Rubio, ka urdhëruar ngrirjen e një pjese të madhe të ndihmave të huaja amerikane, si pjesë e një rishikimi të përgjithshëm të pagesave monetare nga administrata e presidentit Donald Trump.
Sipas një vendimi të nënshkruar nga Rubio, kjo masë do të zgjasë rreth tre muaj dhe ka për qëllim të sigurojë që ndihmat e dhëna janë në përputhje me prioritetet e reja politike.
Pavarësisht ngrirjes së përgjithshme, ndihma ushtarake për Izraelin dhe Egjiptin, si dhe ndihmat emergjente ushqimore, do të përjashtohen nga ky rregull.
A do të preket ndihma për Ukrainën nga ky vendim?
Revista ‘Politico’ raporton se shtrirja e kësaj direktive mbetet e paqartë, duke ngritur pyetje nëse ndihma ushtarake tashmë e miratuar për Ukrainën do të preket nga ky vendim. Ukraina merr ndihmë të rëndësishme nga SHBA, si ushtarake ashtu edhe zhvillimore, dhe çdo pezullim i kësaj ndihme mund të ketë ndikime të mëdha në luftën e saj mbrojtëse nga pushtimi rus.
Për më tepër, sipas burimeve të kësaj reviste, thuhet se fondet për aleatë të rëndësishëm si Jordania, Tajvani dhe Ukraina mund të ndalohen përkohësisht.
Departamenti i Shtetit deri më tani nuk ka dhënë një koment zyrtar lidhur me këtë çështje. Ndërkohë, presidenti Trump po shqyrton gjithashtu mundësinë e shpërbërjes së agjencisë së menaxhimit të fatkeqësive, FEMA, si pjesë e një strategjie të përgjithshme për të rishikuar politikat financiare dhe institucionale të administratës së tij.rtk.
