Të paktën 39 palestinezë të tjerë janë vrarë në sulmet ajrore izraelite në Rripin e Gazës, duke e rritur numrin e të vdekurve që nga tetori 2023 në 50.183, tha sot Ministria e Shëndetësisë në enklavën e rrethuar, trqnsmeton KosovaPost.
Në një deklaratë, Ministria tha se 124 persona të tjerë të plagosur janë transferuar gjithashtu në spitale, duke e çuar numrin e përgjithshëm të të plagosurve në 113.828.
“Shumë viktima janë ende të bllokuar nën rrënoja dhe në rrugë pasi shpëtimtarët nuk janë në gjendje t’i arrijnë ato”, shtoi ajo.
Ushtria izraelite nisi një fushatë të befasishme ajrore në Rripin e Gazës më 18 mars, duke vrarë 830 njerëz dhe duke plagosur afro 1.800 të tjerë, pavarësisht marrëveshjes së armëpushimit dhe shkëmbimit të të burgosurve që u arrit në janar.
Nëntorin e kaluar, Gjykata Ndërkombëtare Penale lëshoi urdhra arresti për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një padi gjenocidi në Gjykatën Ndërkombëtare të Drejtësisë për luftën e tij në enklavën palestineze./AA
