Presidenti i Serbisë, Aleksandar Vuçiq, deklaroi sot se Serbia do ta durojë dhe do ta mposhtë të keqen që “sulmoi vendin nga jashtë dhe që dëshiron ta shkatërrojë atë”, duke theksuar se tre muajt e bllokadave kanë shkatërruar ekonominë e vendit, transmeton Kosova Post.
Duke folur para qytetarëve në Qendrën Kulturore në Krepoljin, në ditën e tretë të vizitës së tij në Serbinë lindore, Vuçiq tha se mjafton vetëm të shikohen “ata që janë bashkuar dhe që mbështesin të gjithë ata që janë kundër Serbisë – nga Albin Kurti deri te kroatët dhe Sarajeva – dhe gjithçka është e qartë”.
“Askush tjetër nuk ka nevojë t’ju shpjegojë asgjë më shumë. Askush tjetër nuk duhet të thotë asgjë më shumë. Vetëm shikoni ata që u bashkuan në luftën kundër Serbisë dhe do të kuptoni gjithçka. Ne do t’ia dalim. Na shkatërruan tre muaj, na morën tre muaj”, ka thënë Vuçiq, transmeton Tanjug.
Ai theksoi se tre muaj bllokada kanë shkatërruar ekonominë e Serbisë, por shtoi se “ne do ta ngremë Serbinë” dhe shprehu besimin se Serbia këtë vit do të jetë ndër tre vendet e para për nga norma e rritjes në gjithë Evropën.
Studentët dhe qytetarët kanë protestuar që nga fundi i vitit të kaluar, pasi 15 persona humbën jetën kur mbuloja u shemb në stacionin kryesor hekurudhor në Novi Sad më 1 nëntor.
Të paktën 63 fakultete të pesë universiteteve shtetërore, dy fakultete private dhe katër kolegje profesionale janë nën bllokim.
Kryeministri serb Millosh Vuçeviq ka dhënë dorëheqjen si kreu i qeverisë dhe hetime dhe arrestime të të dyshuarve për korrupsion janë nisur në gjithë vendin.
