Shkruan: Deputeti i Lëvizjes Vetëvendosje, Ilir Kerçeli
Procedura për zgjedhjen e Presidentit të Republikës së Kosovës ka hapur diskutime rreth shpërndarjes së Kuvendit dhe respektimit të afateve kushtetuese.
Sipas Nenit 82 të Kushtetutës së Kosovës, Kuvendi mund të shpërndahet nëse brenda 60 ditësh nga fillimi i procedurës së zgjedhjes së Presidentit nuk arrihet të zgjidhet kreu i shtetit. Gjithashtu, nëse në votimin e tretë asnjë kandidat nuk arrin të zgjidhet President, atëherë hapet rruga për shpërndarjen e Kuvendit dhe shpalljen e zgjedhjeve të reja.
Megjithatë, në rrethanat aktuale, procedura e zgjedhjes së Presidentit ka filluar vetëm së fundmi. Nuk është konsumuar ende paragrafi i gjashtë i Nenit 86 të Kushtetutës, që nënkupton se afati 60-ditor për zgjedhjen e Presidentit nuk ka përfunduar.
Në të njëjtën kohë, deputetëve aktualë u kanë mbetur edhe rreth 27 ditë nga mandati i tyre, çka tregon se afati ligjor dhe kushtetues për përmbylljen e kësaj procedure nuk është shteruar ende.
Debati është përqendruar edhe te interpretimi i Nenit 86. Nëse vendimi për shpërndarjen e Kuvendit mbështetet në paragrafin 2 të këtij neni, atëherë kjo mund të konsiderohet një interpretim i gabuar, pasi kjo dispozitë kushtetuese nuk e obligon automatikisht shpërndarjen e Kuvendit dhe është e heshtur për një veprim të tillë.
Për këtë arsye, çdo vendim për shpërndarjen e Kuvendit duhet të mbështetet qartë në Kushtetutën dhe ligjet e Republikës së Kosovës, duke respektuar procedurat, afatet kushtetuese dhe të drejtat e deputetëve, si dhe vullnetin e mbi një milion qytetarëve që përfaqësohen në Kuvend.
