Serbë e shqiptarë janë arrestuar viteve të fundit në Kosovë nën dyshimet se po spiunonin për shërbimet e inteligjencës së Serbisë. Arrestimi i fundit për dyshime të tilla ndodhi më 6 maj, dhe i arrestuari dyshohet se spiunimin e bënte për rreth 700 euro kompensim. Derisa shpeshtohen rastet, njohësit e sigurisë thonë se inteligjenca serbe ka shtrirë rrënjët në tërë territorin e Kosovës ndër vite.
Në vitet e fundit, institucionet e sigurisë së Kosovës kanë shtuar përpjekjet për të luftuar veprimtaritë e dyshimta të spiunazhit, kryesisht në favor të shërbimeve inteligjente serbe.
Policia dhe Prokuroria Speciale kanë realizuar disa arrestime në kuadër të hetimeve për cenim të sigurisë kombëtare.
Më poshtë paraqesim disa nga rastet kryesore, duke ngritur pyetjen: A është vërtet kaq aktive inteligjenca serbe në Kosovë?
Raste të spiunazhit të dyshuar
Më 7 maj 2025 u arrestua Hysri Selimi, shtetas i Kosovës, nën dyshimin se bashkëpunonte me Agjencinë Serbe të Inteligjencës (BIA).
Sipas dosjes hetimore, ai dyshohet se kishte dërguar të dhëna për persona të radikalizuar dhe pjesëmarrjen e tyre në luftën në Siri.
Selimi kishte luftuar përkrah ISIS-it dhe ishte dënuar me burgim pas riatdhesimit. Për një kompensim prej rreth 700 eurosh, ai dyshohet se kishte ndarë informacione me BIA-n, përfshirë të dhëna për zyrtarë politikë dhe institucione të sigurisë.
Në qershor 2024 u arrestuan edhe dy shtetas të tjerë kosovarë – Bedri Shabani dhe Muharrem Qerimi – të dyshuar për spiunim në favor të BIA-s. Shabani akuzohet se ka shpërndarë informacione që nga periudha e luftës së viteve 1998–1999 deri në arrestimin e tij. Ndërsa Qerimi dyshohet se ka dhënë informacione për UÇK-në, Policinë e Kosovës, Agjencinë e Kosovës për Inteligjencë (AKI) dhe dëshmitarët e Gjykatës Speciale.
Në shkurt 2025, një punonjëse serbe e OSBE-së në Mitrovicën e Veriut u arrestua nën dyshimin për bashkëpunim me inteligjencën serbe, pasi dyshohej për shpërndarje të informatave të ndjeshme.
Arrestime të tjera dhe reagimet
Më 15 prill 2025, ministri i Brendshëm në detyrë, Xhelal Sveçla, njoftoi për arrestimin e 16 personave, përfshirë katër oficerë të dyshuar serbë të inteligjencës. Megjithatë, shumica e tyre u liruan për shkak të mungesës së provave të mjaftueshme.
Eksperti i sigurisë Burim Ramadani thekson se rritja e arrestimeve tregon për përpjekjet e vazhdueshme të Serbisë për destabilizim të Kosovës.
“BIA serbe, sikurse edhe në dekadat e kaluara, mbetet shumë aktive në minimin e shtetësisë së Kosovës. Në bindjen time është krejtësisht e qartë se Serbia ka plan ose program afatgjatë që ta bëjë Kosovën së pari të pajetueshme, së dyti, të vendosur në destabilitet të brendshëm dhe së treti të thellojë përçarje midis shumicës shqiptare dhe komuniteteve tjera”, ka deklaruar Ramadani.
Ndërkohë, agjencia serbe e inteligjencës ka mohuar kategorikisht se ndonjë pjesëtar i saj është arrestuar në Kosovë. Megjithatë, organizata të ndryshme vendore dhe ndërkombëtare vazhdimisht kanë ngritur shqetësime se Kosova mbetet e ekspozuar ndaj ndikimit të strukturave paralele serbe dhe përpjekjeve për destabilizim./Radio Evropa e Lirë/
