Profesori universitar Nexhmedin Spahiu ka komentuar zhvillimet e fundit që lidhen me Gjykatën Speciale, duke thënë se vendimet e saj nuk duhet të konsiderohen befasuese dhe se përgjegjësinë politike për themelimin e saj e mbajnë ata që e kanë votuar.
Ai shtoi se, në rast se gjykata nxjerr një aktgjykim lirues, atëherë – sipas tij – ata që e kanë kritikuar vazhdimisht duhet të reflektojnë për qëndrimet e tyre.
“Nuk më befason vendimi i Gjykatës Speciale. Mbetet për t’u parë se çfarë vendimi do të marrë, por sidoqoftë përgjegjësinë se nëse kjo gjykatë ka dalë jashtë binarëve e kanë vetë ata që e kanë votuar atë. Pse s’i kanë hapur sytë mirë? Nëse çdo gjë shkon mirë, atëherë këta që po e shajnë Gjykatën Speciale atëherë duhet të pendohen, sepse gjatë gjithë kohës po e shajnë pse, por nëse jep aktgjykim lirues çfarë do të thonë këta?”, deklaroi ai në emisionin “Info Nata” në Tëvë1.
Spahiu theksoi gjithashtu se protestat publike nuk kanë ndikim në vendimmarrjen e gjykatës.
“Gjykata Speciale nuk ndikohet prej protestave. Përkundrazi, protestat mund të shërbejnë si argument në raport me pretendimet e avokatëve të të akuzuarve, të cilët thonë se klientët e tyre nuk kanë pasur rol komandues. Ndërsa protestuesit po i quajnë komandantë dhe çlirimtarë, gjë që bie ndesh me linjën mbrojtëse”, u shpreh Spahiu. /
