Një ndërprerje masive e energjisë elektrike ka përfshirë pjesë të mëdha të Spanjës dhe Portugalisë, duke shkaktuar kaos në transport, ndërprerje aktivitetesh dhe mbyllje të bizneseve. Autoritetet raportojnë se shkaku lidhet me një fenomen atmosferik të rrallë.
Një ndërprerje masive e energjisë elektrike ka goditur pjesë të mëdha të Spanjës dhe Portugalisë.
Operatori portugez i energjisë elektrike thotë se ndërprerja u shkaktua nga një fenomen “i rrallë” atmosferik, i lidhur me ndryshimet e temperaturave, raporton BBC.
Kryebashkiaku i Madridit ka paralajmëruar që njerëzit të mos dalin në rrugë dhe të telefonojnë shërbimet e emergjencës vetëm nëse është “vërtet urgjente”.
Ndërprerja ka anuluar seancat e ditës dhe të natës në Madrid Open, duke i detyruar tifozët dhe lojtarët të largohen nga turneu i tenisit në errësirë.
Dyqanet dhe restorantet janë prekur, ndërsa transporti publik është ndërprerë rëndë, me disa pasagjerë të mbetur të bllokuar dhe të tjerë të evakuuar nga trenat.
Operatori i rrjetit të energjisë elektrike të Spanjës thotë se energjia elektrike tashmë po kthehet në disa pjesë të vendit, por rikthimi i energjisë në Portugali mund të zgjasë shumë më tepër./rtk
