Spitalet në Gaza janë “tërësisht të mbingarkuara; nuk ka shtretër të mjaftueshëm dhe mungon stafi për të përballuar fluksin; pacientët trajtohen në dysheme”, tha për Al Jazeera Hannah Grace Pan, një infermiere pediatrie vullnetare nga Mbretëria e Bashkuar.
Ajo shpjegoi se shumë pacientë, përfshirë fëmijë të vegjël, po vuajnë nga lëndime të rënda dhe djegie të dhimbshme, por nuk marrin asnjë lloj trajtimi kundër dhimbjes, pasi medikamentet përkatëse nuk janë të disponueshme.
Si shembull, Grace Pan përmendi një djalë trevjeçar që u soll në spital javën e kaluar – i vetmi i mbijetuar nga një sulm ajror që vrau gjithë familjen e tij. Spitali nuk kishte as specialist për djegiet, as mjaftueshëm lëngje apo ushqim për të përshpejtuar shërimin e plagëve të tij.
Ndër rastet më të rënda që ajo ka përjetuar, ishte ai i një gruaje shtatzënë, 30 javëshe, e cila u plagos rëndë nga shrapneli i një sulmi ajror izraelit që i përshkoi gjoksin dhe i çau barkun.
Mjekët, pasi e nxorën foshnjën nga barku i saj, zbuluan se ajo kishte vdekur nga dëmtimet e shkaktuara nga copa metali që e kishin goditur në barkun e nënës.
Agjencia e OKB-së për refugjatët palestinezë thotë se kolapsi i shërbimeve të kujdesit shëndetësor në Gaza po rrezikon jetën e të gjithë popullsisë prej 2.3 milionë banorësh, me të moshuarit veçanërisht të prekshëm.
“Të sëmuresh do të thotë ta përballosh atë vetëm pa ambulanca, me mungesë furnizimi mjekësor apo mbështetjeje”, tha ajo në një postim në X.
UNRWA përsëriti thirrjen e saj për një armëpushim të përhershëm “për t’i mbrojtur ata”.
