Tensione dhe përplasje verbale janë shënuar të mërkurën në Kuvendin e Kosovës, gjatë aktiviteteve të organizuara me qytetarë. Deputetë të PDK-së dhe Aleancës kanë kundërshtuar pjesëmarrjen e deputetëve dhe figurave të Lëvizjes Vetëvendosje në aktivitet, duke kërkuar që të vazhdojë seanca konstituive e Kuvendit.
Në momentin kur deputetët e LVV-së janë afruar për të komunikuar me qytetarët, deputetët e PDK-së kanë protestuar dhe kanë brohoritur, duke krijuar situata të tensionuara në sallë.
Përplasjet janë shënuar edhe gjatë fjalimeve të zyrtarëve të LVV-së. Ministrja në detyrë e Drejtësisë, Donika Gërvalla, nuk ka arritur ta mbajë fjalën e saj për shkak të brohoritjeve nga deputetët e PDK-së.
Ndaj Gërvallës janë dëgjuar thirrjet “Demokraci” dhe “UÇK”.
Një situatë e ngjashme është krijuar edhe me ushtruesen e detyrës së presidentes, Albulena Haxhiu. Ajo është përballur me thirrjet e deputetëve të PDK-së për vazhdimin e seancës konstituive dhe nuk e ka zhvilluar konferencën për media në hollin e Kuvendit.
Haxhiu ka bërë të ditur se konferencën nuk do ta mbajë nëse deputetët e PDK-së nuk largohen nga hapësira.
Ndërkohë, gjatë zhvillimeve në sallë, deputetë të opozitës kanë bërë edhe përpjekje për t’i larguar nga salla disa deputetë të Vetëvendosjes, duke e rritur edhe më tej tensionin.
Përplasjet vijnë në kohën kur Kuvendi vazhdon të përballet me ngërç rreth konstituimit dhe vazhdimit të seancës konstituive.
PDK dhe AAK kërkojnë vazhdimin e seancës
Deputetët e Partisë Demokratike të Kosovës dhe Aleancës kanë vazhduar të qëndrojnë në sallën e Kuvendit të Kosovës, duke kërkuar nga kryesuesi Avni Dehari që të thërrasë vazhdimin e seancës për konstituimin e legjislaturës.
Gjatë qëndrimit në sallë, deputetë të PDK-së kanë mbajtur fjalime nga foltorja, duke insistuar se procesi i konstituimit duhet të përmbyllet dhe se tejkalimi i afatit kushtetues nuk e eliminon këtë obligim.
Deputeti i PDK-së, Arian Tahiri, tha se deputetët e kanë marrë mandatin nga qytetarët dhe se askush nuk mund t’ua mohojë ushtrimin e tij.
“Mandatin na e ka dhënë populli, nuk na e ka dhënë Albin Kurti dhe nuk mund të na i marrë”, deklaroi Tahiri.
Ai tha se prania e deputetëve në Kuvend është një mënyrë për të shprehur qëndrimin e tyre dhe për të kërkuar funksionalizimin e institucioneve.
“Me qëllim që ta mbrojmë kushtetutshmërinë dhe ta funksionalizojmë Kuvendin, kemi ardhur këtu ku e kemi mandatin, për ta përcjellë qëndrimin tonë”, u shpreh ai.
Tahiri paralajmëroi se, në rast se mundësitë për zgjidhjen e situatës brenda Kuvendit shterojnë, partia e tij do të ndërmarrë hapa të tjerë politikë.
“Nëse shteren mundësitë brenda Kuvendit, do të jenë hapat tanë të tjerë të guximshëm për ta mbrojtur shtetin”, tha deputeti i PDK-së.
Ai gjithashtu bëri thirrje për reagim qytetar lidhur me situatën politike dhe institucionale në vend.
Ndërkaq Besnik Tahiri i Aleancës ka thënë se s’do të lejohet “dhunimi i së drejtës së qytetarëve”.
“Sovraniteti i takon popullit, i takon institucioneve të zgjedhura dhe ne që jemi këtu jemi të zgjedhur. Bllokimi i kuvendit është cenim i sovranitetit, rendi kushtetues dhe demokracisë. Nuk do të lejojmë në asnjë formë që të dhunohet e drejta e qytetarëve që me pas institucione”, ka thënë ai.
Ndërkohë, PDK-ja i është drejtuar më herët me letër kryesuesit të Kuvendit, Avni Dehari, duke kërkuar që seanca të vazhdojë pa vonesa.
Sipas kësaj partie, moskonstituimi i Kuvendit brenda afatit të përcaktuar ka krijuar një situatë të rëndë kushtetuese, por kjo, sipas tyre, nuk e heq përgjegjësinë për përfundimin e procesit.
“Obligimi për përfundimin e procesit konstituiv mbetet dhe duhet të përmbushet pa vonesa të mëtejshme”, thuhet në letrën e PDK-së.
Partia ka kërkuar që deputetëve të zgjedhur t’u mundësohet ushtrimi i mandatit dhe që seanca për konstituimin e Kuvendit të thirret sa më shpejt.
