Gjykata Supreme e Kosovës ka ndryshuar vendimin për dënimin ndaj të pandehurit Edmond Lajqi duke ia zëvendësuar dënimin me burgim të përjetshëm me një dënim prej 30 vjetësh burgim, transmeton KosovaPost.
Sipas njoftimit të Gjykatës Supreme, vendimi është marrë pas shqyrtimit të ankesës së mbrojtësit të të pandehurit dhe përgjigjes në ankesë të përfaqësueses së autorizuar të palës së dëmtuar. Gjykata ka aprovuar pjesërisht ankesën, duke ndryshuar aktgjykimet e Gjykatës Themelore në Pejë dhe të Gjykatës së Apelit vetëm sa i përket lartësisë së dënimit.
Edmond Lajqi i shpallur fajtor për veprat penale të vrasjes së rëndë dhe mbajtjes në pronësi, kontroll ose posedim të paautorizuar të armëve, është dënuar me 30 vjet burgim. Në këtë dënim do të llogaritet edhe koha e kaluar në paraburgim nga 16 prilli 2024.
Në pjesët e tjera, aktgjykimet e Gjykatës Themelore në Pejë dhe të Gjykatës së Apelit kanë mbetur në fuqi.
Gjykata Supreme ka konstatuar se gjykatat e shkallëve më të ulëta kanë vërtetuar drejt fajësinë e të pandehurit dhe cilësimin juridik të veprave penale, duke mos gjetur shkelje esenciale të procedurës penale apo të ligjit penal në këtë aspekt. Po ashtu, ka vlerësuar se, pas pranimit të fajësisë nga i pandehuri, pretendimet për vërtetim të gabuar ose jo të plotë të gjendjes faktike nuk ishin të lejuara sipas Kodit të Procedurës Penale.
Megjithatë, Supremja ka vlerësuar se gjykatat e shkallës së parë dhe të dytë nuk e kanë zbatuar drejt nenin 41 të Kodit Penal lidhur me shqiptimin e dënimit me burgim të përjetshëm. Sipas saj, disa nga rrethanat e konsideruara si veçanërisht rënduese nuk kanë qenë të mbështetura në prova, ndërsa disa të tjera përbëjnë elemente të vetë veprës penale dhe nuk mund të shërbejnë si bazë për shqiptimin e dënimit më të rëndë.
Gjykata ka theksuar se burgimi i përjetshëm mund të shqiptohet vetëm kur ekzistojnë rrethana veçanërisht rënduese që e dallojnë qartë rastin konkret nga rastet e zakonshme të së njëjtës vepër penale dhe kur një dënim më i butë nuk do të ishte proporcional me peshën e veprës dhe fajësinë e kryerësit.
Sipas vlerësimit të Gjykatës Supreme, në rastin konkret ky standard ligjor nuk është përmbushur. Duke u mbështetur në parimin e individualizimit dhe proporcionalitetit të dënimit, si dhe në praktikën e Gjykatës Evropiane për të Drejtat e Njeriut, Supremja ka vlerësuar se dënimi me 30 vjet burgim është proporcional me peshën e veprës penale, shkallën e fajësisë dhe rrezikshmërinë e të pandehurit.
