Ministri në detyrë i Punëve të Brendshme, Xhelal Sveçla, ka mirëpritur nisjen e procesit gradual të largimit të KFOR-it nga Ura Kryesore e Mitrovicës.
Ai ka deklaruar se, me përmirësimin e situatës së sigurisë, do të reduktohet edhe prania e Policisë së Kosovës në Urën Kryesore të Mitrovicës.
Ai tha se procesi do të vijojë në koordinim të ngushtë me KFOR-in, i cili deri tani ka pasur përgjegjësinë për sigurinë në këtë urë, ndërsa Policia e Kosovës po rrit kapacitetet e saj.
Sveçla ka thënë se bëhet fjalë për një proces afatshkurtër, ndërsa ka paralajmëruar edhe lajme të tjera lidhur me hapat e ardhshëm.
“Patjetër që ky është një lajm i mirë. Gjithë procesi do të vijojë në koordinim të ngushtë me KFOR-in, me KFOR-in të cilët deri tani kanë pasur përgjegjesinë e sigurisë në këtë urë dhe Policia e Kosovës po rinovon”, tha ai për RTK.
“Po, sigurisht që me përmirësimin e sigurisë edhe vet prezenca e Policisë së Kosovësdo të reduktohet. Është një proces afatshkurtër, i cili do të ofrojë garanca për të gjithë se hapja e urës do të jetë një e mirë për të gjithë, pa pasur ndikim negativ ndaj askujt. Do të vijë momenti kur hapat e ardhshëm edhe do të bëhen publik, edhe do të shihen ashtu siç po shihen sot. Dhe një gjë e cila ka qenë brengë, por edhe simbol i ndarjes për 27 vite do të jetë një kujtim”, tha ai.
Ai ka thënë se institucionet janë të angazhuara që procesi të përfundojë sa më mirë dhe ka paralajmëruar zhvillime të reja.
“Të gjithë jemi të angazhuar që ky proces të përfundojë sa më mirë që është e mundshme, shumë shpejt do të kemi lajme të tjera të mira”, tha ai.
Duke komentuar deklaratat nga Serbia dhe zhvillimet e fundit që lidhen me sigurinë, Sveçla ka thënë se Kosova është forcuar dhe se është e gatshme të garantojë siguri për të gjithë.
“Po, për sa i takon deklaratave, ne jemi mësuar të dëgjojmë në vazhdimësi deklarata të cilat cenojnë sovranitetin, e rrezikojnë rrezikun, e rrezikojnë sigurinë e Republikës së Kosovës. Me thënë të drejtën, nuk është se edhe na bën përshtypje, për shkak se nuk jemi të befasuar nga qëndrimet e tyre. Ashtu siç kam deklaruar edhe më herët, Serbia nuk ka ndryshuar, është po ajo e 98-99-ës, po ajo edhe e viteve të mëhershme. Por, Kosova nuk është më e njëjta. Kosova po forcohet, Kosova realisht po ecën përpara dhe është e gatshme që të marrë të gjitha përgjegjësitë për të garantuar siguri për të gjithë. Dhe përmes kësaj të ofrojmë rrugë e qasje për zhvillim e prosperitet më të tejshëm të Republikës së Kosovës”, tha ai, raporton RTKLive.
Sa i përket shpalljes person non grata të drejtorit të Telekomit të Serbisë, Sveçla ka paralajmëruar masa të njëjta edhe ndaj personave të tjerë që, sipas tij, mund të rrezikojnë sovranitetin dhe integritetin territorial të Kosovës.
“Për sa i takon shpalljes persona non grata apo person i padëshirueshëm për drejtorin e Telekomit të Serbisë, çdokush që vjen në territorin e Republikës së Kosovës dhe punon e pretendon që të rrezikojë sovranitetin apo integritetin territorial të saj, do të përballet me të njëjtat masa”, tha ai.
