Zyra e Presidentes, do të jetë vendi ku do t’i “bashkojë” liderët e partive politike.
Presidentja e Kosovës Vjosa Osmani, të enjten i ka thirrur ata në takim konsultativ në përpjekje për ta zhbllokuar “ngërçin” politik që po mbretëron në vend, ku as pas tentimit të 15-të nuk u konstituua Kuvendi i Kosovës.
“PO”, shefes së shtetit i thanë krejt: LVV, PDK, LDK e AAK.
Emri i Albulena Haxhiu, assesi të kalojë prej subjekteve politike që në legjislaturën e kaluar ishin në opozitë, duke deklaruar se s’kanë votë për Haxhiun që po e konsiderojnë si përçarëse.
Madje, i kërkon liderit të Vetëvendosjes, Albin Kurtit, që ta ndërrojë propozimin.
Për të 16-tën herë do të tentohet të bëhet diçka të enjten e 15 majit, prej orës 10:00.
Vazhdimi i seancës do të mbahet fiks, tri orë para se të ndodh takimin në Presidencë.
Kjo seancë vështirë se do të prodhojë ndonjë rezultat të ri, bazuar në pozicionimin stoik të palëve.
E mbetet të shihet nëse do të ketë ndonjë lëvizje pas takimit me shefen e shtetit.
Sipas analistit Labinot Balaj, leva kryesore për tejkalimin e situatës politike është tek tri partitë kryesore: LVV, PDK e LDK.
“Anipse jam dyshues që zgjidhja është determinuar nga ndërhyrja e presidentes. Leva ose mekanizmi që mund të zgjedh “nyjën gordiane” është në dorën e tri partive politike: LVV, PDK dhe LDK. Është në vullnetin e tyre nëse duan të gjejnë një modus për tejkalim të kësaj bllokade”, deklaroi Balaj për Klankosova.tv.
Balaj shtoi se “PO-ja” e subjekteve politike për takimin me presidenten burimin e ka më tepër në kalkulimin elektorial.
“Gatishmëria e tyre (partive politike) e demonstruar në raport me ftesën e presidentes nuk dëfton partitë si konstruktive. Kjo për faktin se “Po-ja” e tyre burimin e ka më tepër në kalkulimin elektoral: Një komunikim me publikun i tipit “ne po bëjmë çmos që ta tejkalojmë situatën”. Tjetër, pa i llogaritur efektet që janë në funksion të tejkalimit të bllokadës, ftesa e presidentes, në rend të parë, iu leverdisë palëve të përfshira në kontest (lexo: partive politike) që njëjtë ta ushqejnë shpresën se zgjidhja është e mundshme përmes një instance të tretë, siç është presidentja, do t’i çlirojë ato nga barra e përgjegjësisë”, shtoi Balaj
Sipas tij ka zëra se PDK ka shprehur gatishmëri që të ndërtojë bashkëqeverisje me Vetëvendosjen.
“Në qarqe që militojnë të VV-ja dhe PDK-ja, flitet se kjo e fundit e ka shprehur gatitshmërinë të ndërtojë një bashkëqeverisje me Vetëvendosje, madje nuk ka abstenuar nga kushti që bartësi i ekzekutivit të jetë nga radhët e partisë së tyre. E vetmja pengesë në këtë partneritet është vullneti e apatia tek një pjesë e strukturave të VV-së”, theksoi ai.
