Ministri në detyrë i Punëve të Jashtme, Glauk Konjufca, ka reaguar pas raportimeve se gjatë një tubimi me qytetarë e kishte quajtur “frizerkë” ish-presidenten Vjosa Osmani, duke theksuar se deklarata e tij nuk kishte të bënte me Osmanin.
Sipas Konjufcës, diskutimi rreth termit “frizere” kishte vetëm një qëllim: të tërhiqte vërejtjen që ky profesion të mos përdorej në mënyrë përçmuese.
“Unë rrallë reagoj për lajme të rreme, sepse sot kjo të imponon të reagosh pothuajse çdo orë. Por kjo luftë speciale e sontme nuk më la indiferent. Meqë po e vërej qartë se prapa këtij shtrembërimi të qëllimshëm ekzistojnë qindra mekanizma të riprodhimit me një qëllim vërtet të keq. E qëllimi është kontaminimi i skenës politike edhe në hapësirat e fundit”, ka shkruar ai në Facebook.
Konjufca ka sqaruar se gjatë një tubimi në Ferizaj, një “pseudogazetar” ka përdorur termin “frizere”, ndërsa ai ka reaguar duke theksuar se shumë gra dhe vajza në Kosovë e ushtrojnë me dinjitet këtë profesion dhe mbajnë familjet e tyre.
Ai ka shtuar se profesioni i frizeres është përfshirë edhe në programin e arsimit dual të inauguruar nga qeveria, duke potencuar se reagimi i tij kishte të bënte vetëm me mbrojtjen e dinjitetit të këtij profesioni.
“Asnjë diskutim imi nuk ka pasur të bëjë me Presidenten Osmani. Mediat qëllimkëqija, për kushedi çfarë kalkulimesh, e prenë vetëm termin ‘frizere’ dhe më pas ndërtuan rrëfimin e tyre të paqenë”, ka deklaruar Konjufca, duke akuzuar mediat për shtrembërim të deklaratës së tij.
Tutje, ai ka thënë se me Osmanin ka bashkëpunim të gjatë dhe respekt të ndërsjellë, ndërsa ka kërkuar ndjesë ndaj të gjithë atyre që mund të jenë ndjerë të lënduar nga interpretimet e krijuara rreth kësaj deklarate.
“Të gjithë ata që më njohin, e edhe vetë znj. Osmani, me të cilën kam bashkëpunim të gjatë dhe respekt të ndërsjellë, të cilin e ruaj edhe sot, e dinë qasjen time në politikë. Për çdo rast, të gjithë atyre që ky konstrukt i inxhinieruar i luftës speciale i ka lënduar, u kërkoj ndjesë”, ka përfunduar Konjufca
