Institucionet e Kosovës po vazhdojnë punën për dokumentimin sistematik të krimeve të kryera gjatë luftës, me theks në ndërtimin e arkivave shtetërore të verifikuara që synojnë ruajtjen e kujtesës historike dhe forcimin e drejtësisë tranzicionale, transmetin KosovaPost.
Në këtë kuadër, kryeministri në detyrë i Republikës së Kosovës, Albin Kurti, ka pritur sot në takim Drejtorin Ekzekutiv të Institutit të Krimeve të Kryera Gjatë Luftës në Kosovë (IKKL), Atdhe Hetemi. Ky i fundit ia dorëzoi Kurtit raportin gjashtëmujor të punës për periudhën nëntor 2025 – maj 2026.
Sipas njoftimit nga Kryeministria, gjatë takimit u diskutua mbi progresin e arritur në dokumentimin, hulumtimin dhe institucionalizimin e kujtesës historike lidhur me krimet e kryera gjatë luftës në Kosovë, si dhe mbi rëndësinë e forcimit të kapaciteteve shtetërore në funksion të drejtësisë tranzicionale dhe ruajtjes së të vërtetës historike.
“Drejtori Hetemi e njoftoi kryeministrin në detyrë me projektet dhe zhvillimet kryesore të Institutit gjatë kësaj periudhe, ndër të cilat veçohet puna për përgatitjen e databazave të viktimave të luftës së fundit në Kosovë, databazës së masakrave dhe asaj të varrezave masive — procese me rëndësi të veçantë shtetërore dhe historike, të cilat po ndërmerren për herë të parë në Republikën e Kosovës në mënyrë të centralizuar, të verifikuar dhe institucionale”, thuhet në njoftim.
Tutje thuhet se këto databaza do të shërbejnë si bazë e qëndrueshme për dokumentim, hulumtim shkencor, edukim dhe adresim institucional të krimeve të luftës.
Po ashtu, u diskutua edhe për zgjerimin dhe konsolidimin e fondit arkivor e bibliotekar të Institutit, avancimin e proceseve të verifikimit dhe sistemimit të materialeve dokumentuese, si dhe për bashkëpunimin me institucione vendore e ndërkombëtare në fushën e drejtësisë tranzicionale dhe kujtesës kolektive.
Sipas njoftimit, në takim u veçua edhe organizimi i konferencës ndërkombëtare “From War to Recovery: A Multidisciplinary Approach Towards Kosovo’s War Trauma”, me pjesëmarrjen e mbi 200 studiuesve, ekspertëve dhe përfaqësuesve institucionalë vendorë, rajonalë e ndërkombëtarë, si një dëshmi e shtrirjes akademike dhe ndërkombëtare të punës së Institutit.
“Kryeministri në detyrë Kurti e falënderoi drejtorin Hetemi dhe stafin e Institutit për përkushtimin dhe punën e bërë, duke vlerësuar rolin e IKKL-së në dokumentimin e krimeve të luftës, ruajtjen e kujtesës historike dhe ndërtimin e një baze të besueshme faktesh për brezat e ardhshëm. Ai theksoi se drejtësia për viktimat, dokumentimi institucional dhe mbrojtja e së vërtetës historike mbeten obligim shtetëror dhe shoqëror i Republikës së Kosovës”, thuhet tutje në njoftim.
