Ish-shefi i kabinetit të Presidentes Vjosa Osmani, Blerim Vela, ka lëshuar një sërë kritikash në rrjetet sociale, të cilat shihen si të drejtuara ndaj ish presidentes dhe rrethit të saj politik në prag të zgjedhjeve të 7 qershorit.
Në reagimin e tij, Vela thotë se parafushata po nxjerr në pah “fytyrën e vërtetë” të disa politikanëve, duke shtuar se imazhi i ndërtuar ndër vite përmes marrëdhënieve me publikun po zbehet dhe po zëvendësohet nga mungesa e vizionit politik.
“Parafushata për zgjedhjet e 7 qershorit po na kursen shumë kohë: disa politikanëve po u bie maska vetë, pa pasur nevojë për analiza të gjata. PR-i i kuruar me vite po zbehet shpejtë dhe në pah po dalin ide të cekëta, inati si motivues dhe mungesë e çfarëdo vizioni politik”, ka shkruar Vela.
Ai kritikon gjithashtu përpjekjet e disa figurave politike për t’u paraqitur si të pazëvendësueshme, duke theksuar se Kosova nuk është projekt personal i askujt, por shtet i qytetarëve të saj.
“Me vetëbesim dhe seriozitet mbresëlënës, ata vazhdimisht po tentojnë të bindin votuesit se janë të pazëvendësueshëm – sikur Kosova të ishte projekt personal i tyre dhe jo shtet i qytetarëve të saj”, shprehet ai.
Në pjesën më të drejtpërdrejtë të reagimit, Vela ironizon atë që e quan politikë të bazuar në imazh dhe paraqitje publike, duke përmendur “VIP terminalet e aeroporteve” dhe paraqitjet luksoze, në një referencë që është interpretuar si kritikë ndaj mënyrës së komunikimit publik të Presidentes Osmani.
“Për fat të mirë, realiteti është më kokëfortë se PR-shfaqjet nga VIP terminalet e aeroporteve e para timoneve të makinave; Kosova nuk ka nevojë për ‘shpëtimtarë’ të vetëshpallur që luftojnë për karrige”, ka përfunduar Vela.
Reagimi vjen në një kohë kur skena politike në Kosovë po hyn në fazën e parafushatës për zgjedhjet e 7 qershorit, ndërsa deklaratat e ish-bashkëpunëtorit të afërt të Presidentes kanë ngjallur vëmendje dhe interpretime të shumta në opinionin publik.
